اسلام آباد(این این آئی)پاکستان اور آئی ایم ایف کے جائزہ مشن کے درمیان ایک ارب ڈالر کی اگلی قسط کیلئے جاری تکنیکی سطع کے مذاکرات مکمل ہوگئے جبکہ پالیسی سطع کے مذاکرات کا دوسرا مرحلہ پیر کو شروع ہوگا۔ذرائع کے مطابق پاکستان اور آئی ایم ایف مشن کے درمیان مذاکرات کا پہلا مرحلہ مکمل ہوگیا ہے ،تکنیکی سطح کے مزاکرات میں جمعہ کو خیبرپختونخوا نمائندہ کی مشن سے ملاقات ہوئی جس میں خیبرپختونخوا حکومت کی جانب سے معاشی اقدامات کے بارے میں بریفنگ دی گئی۔خیبرپختونخوا حکومت کے نمائندے نے صوبائی حکومت کی جانب سے زرعی انکم ٹیکس قانون سازی بارے آگاہ کیا گیا۔ذرائع کے مطابق صوبائی سطح پر محصولات میں اضافے کیلیے اقدامات پر بریفنگ دی گئی، اس کے علاوہ مذاکرات میں سرکاری افسران کی کارکردگی بڑھانے کے بارے میں امور کا بھی جائزہ لیا گیا اور گورننس میں بہتری کیلئے اقدامات بارے بھی تفصیلی جائزہ لیا گیا۔آئی ایم ایف مشن کے ساتھ تکنیکی سطح کے مزاکرات کا پہلا مرحلہ مکمل ہو گیا ہے اور اب اقتصادی جائزے کیلئے پالیسی سطح پر مذاکرات کا دوسرا مرحلہ پیر کو شروع ہوگا۔
اسلام آباد(این این آئی)وفاقی وزیر مملکت سینیٹر طلال چوہدری نے کہا ہے کہ سائنس اینڈ ٹیکنالوجی کا وزیر بننے کیلئے کسی کا سائنسدان ہونا ضروری نہیں۔نجی ٹی وی پروگرام میں گفتگوکرتے ہوئے طلال چوہدری نے کہا کہ وزیر داخلہ محسن نقوی ہیں اور پرویز خٹک امور داخلہ کے مشیر ہیں۔انہوں نے کہا کہ اتحادی حکومت ہے سب چاہتے ہیں کہ ہم خیال طاقتیں ساتھ چلیں،کسی کو نوازنے کیلئے نہیں، ضرورت کے مطابق کابینہ میں توسیع کی گئی۔وفاقی وزیر مملکت نے کہا کہ تجربہ کار افراد کو ٹیکنوکریٹ کے طور پر شامل کیا جاتا ہے، وزیراعظم شہباز شریف کا اختیار ہے کہ وہ ٹیم میں تبدیلی کریں۔انہوںنے کہاکہ علیم خان نے مشاورت کے بعد دوسرے قلمدان خود چھوڑے، سائنس اینڈ ٹیکنالوجی کا وزیر بننے کیلئے کسی کا سائنسدان ہونا ضروری نہیں۔طلال چوہدری نے کہا کہ یہ نہیں ہوسکتا کہ ملک سے باہر چھوڑے لوگ کچھ بھی بیان جاری کریں، اپنے بیانات تسلیم کریں یا یہ پھر پارٹی اکاؤنٹس نہیں ہونے چاہئیں۔
