ممبئی (این این آئی)بالی ووڈ اداکارہ امریتا رائو نے انکشاف کیا ہے کہ ان کی شادی بالی ووڈ انڈسٹری کی سب سے سستی ترین شادیوں میں سے ایک تھی جس میں کل ڈیڑھ لاکھ بھارتی روپے خرچے کئے گئے تھے۔
یوٹیوب پر وی لاگر کو انٹرویو دیتے ہوئے اداکارہ نے اپنی شادی کے اخراجات اور شادی کے لباس کے بارے میں بات کرتے ہوئے بتایا کہ انہوں نے2014میں آر جے انمول سے قریبی رشتہ داروں اور دوست احباب کی موجودگی میں مندر میں سادگی سے شادی کی تھی اور اب ان کی ایک بیٹی بھی ہے۔
اداکارہ امریتا رائو نے بتایا کہ ہم نے اپنی شادی پر صرف ڈیڑھ لاکھ بھارتی روپے خرچ کیے، جن میں شادی کے ملبوسات، سفر اور دیگر تمام اخراجات شامل تھے۔انہوں نے بتایا کہ ان کا شادی کا جوڑا صرف 3ہزار بھارتی روپے کا تھا، انہوں نے بتایا کہ انہوں نے شادی سے قبل ہی سادگی سے شادی کرنے کا فیصلہ کر لیا تھا جس کے بارے میں انہوں نے اپنے شوہر انمول کو بھی آگاہ کر دیا تھا۔
