راولپنڈی(این این آئی)ڈی جی آئی ایس پی آر لیفٹیننٹ جنرل احمد شریف نے بھارتی پائلٹ کی پاکستانی تحویل میں ہونے کی خبروں کی تردید کردی۔پریس کانفرنس کے دوران بھارتی پائلٹ کی گرفتاری سے متعلق زیر گردش خبروں بارے سوال کے جواب میں ترجمان پاکستان فوج نے کہاکہ میں واضح کردوں کہ ہمارے پاس کوئی بھارتی پائلٹ نہیں ہے ۔ڈی جی آئی ایس پی آر نے کہا کہ یہ صرف سوشل میڈیا پر پراپیگنڈہ ہے، بھارت کا کوئی پائلٹ ہماری تحویل میں نہیں ہے۔

اسلام آباد (این این آئی)چیئرمین پی ٹی آئی بیرسٹر گوہر نے کہا ہے کہ پاکستان نے مکار دشمن کو بروقت اور بھرپور جواب دیا،آئندہ کوئی جارحیت کی تو تب بھی ایسا سخت جواب آئے گا،بھارت سے سیز فائر ہوسکتا ہے تو پی ٹی آئی سے بھی ہونا چاہیے۔ جاری بیان میں بیرسٹر گوہر نے کہا کہ پاکستان اور بھارت میں سیز فائر خوش آئند ہے، ایسے اقدامات کیے جائیں کہ مستقبل میں ایسے واقعات نہ ہوں۔انہوں نے کہا کہ بھارت کے ساتھ سیز فائر ہوسکتا ہے تو پی ٹی آئی کے ساتھ بھی سیاسی سیز فائر ہونا چاہیے، بانی پی ٹی آئی سب سے بڑی جماعت کے لیڈر ہیں اور وہ جیل میں ہیں،بانی پی ٹی آئی سے پارٹی قیادت اور کارکن ملاقات نہیں کرسکتے۔ انہوں نے کہاکہ بھارت جارحیت سے باز نہیں آرہا تھا، پاکستان کو نقصان پہنچانا چاہتا تھا، قوم نے بھارت کو سیاسی اور ذاتی مفادات سے بالا تر ہوکر جواب دیا ہے۔ انہوں نے کہا کہ بیرسٹر گوہر نے یہ بھی کہا کہ پاکستان نے مکار دشمن کو بروقت اور بھرپور جواب دیا، کسی کو شک نہیں ہونا چاہیے پاکستان نے بھرپور جواب دیا اور بھارت کا غرور خاک میں ملایا۔انہوں نے کہا کہ پاکستان نے جو بھارت کو جواب دیا وہ پوری دنیا نے دیکھا، بھارت نے آئندہ کوئی جارحیت کی تو تب بھی ایسا سخت جواب آئے گا۔

اسلام آباد(این این آئی)وفاقی وزیر برائے منصوبہ بندی، ترقی و خصوصی اقدامات، پروفیسر احسن اقبال کی زیر صدارت آئندہ مالی سال 2025-26 کے پبلک سیکٹر ڈویلپمنٹ پروگرام (PSDP)کیلئے ترجیحی منصوبوں کے تعین پر ایک اہم اجلاس منعقد ہوا۔ اجلاس میں رکن منصوبہ بندی کمیشن اور وزارت کے سینئر افسران نے مختلف شعبوں کے اہم منصوبوں پر بریفنگ دی۔ یہ اجلاس حکومت پاکستان کے ترقی و استحکام کے ایجنڈے کو ہر حال میں جاری رکھنے کے عزم کا مظہر ہے۔اجلاس میں ان منصوبوں کو ترجیح دی گئی جو اڑان پاکستان اور 5Es قومی اقتصادی فریم ورک سے ہم آہنگ ہوں، جن میں برآمدات، برابری و بااختیاری، ای-پاکستان، ماحولیات و موسمیاتی تبدیلی، اور توانائی و بنیادی ڈھانچے کے شعبے شامل ہیں۔وفاقی وزیر احسن اقبال نے کہا کہ چیلنجز کے باوجود ہم پاکستان کی ترقی کے لیے پرعزم ہیں۔ ہم عوام کی بہتری اور ملک کی ترقی پر کوئی سمجھوتہ نہیں کریں گے۔پاک بھارت حالیہ صورتحال اور دفاعی صلاحیتوں اور اقتصادی استحکام پر گفتگو کرتے ہوئے وفاقی وزیر منصوبہ بندی احسن اقبال کا کہنا تھا کہ ہم امن کے خواہاں ہیں، لیکن ملکی سالمیت اور بقا سے بڑھ کر کچھ اہم نہیں۔ انہوں نے کہا کہ پاکستان ایک ذمہ دار ایٹمی قوت ہے، ہماری مضبوط دفاعی صلاحیت مضبوط اور جدید نظام پر استوار ہے۔ ہم بھارت کو اپنی بقا سے کھیلنے یا معیشت کو غیر مستحکم کرنے یا ترقیاتی ایجنڈے کو نقصان پہنچانے کی اجازت نہیں دیں گے۔ جب قوم میں عزم ہو تو کوئی چیلنج ناقابلِ عبور نہیں ہوتا۔وزیرِ منصوبہ بندی نے کہا کہ آئندہ پی ایس ڈی پی کو اڑان پاکستان اور اس کے اہداف سے ہم آہنگ بنایا جائے گا، ایسے منصوبوں کو ترجیح دی جائے گی جو پیداواریت میں اضافے اور 5ایز فریم ورک میں طئے کردہ اہداف کے حصول کا باعث بنیں۔ احسن اقبال نے کہا کہ جاری منصوبوں میں ایسے منصوبے جو تکمیل کے قریب ہیں ان کے لیے فنڈز کی فراہمی کو یقینی بنایا جائے گا۔احسن اقبال نے کہا کہ وزارتِ منصوبہ بندی ایک منظم، مربوط اور موثر ترجیحاتی عمل کے ذریعے ایسے منصوبوں کا انتخاب کر رہی ہے جو قومی ترقیاتی اہداف کے حصول میں مددگار ہوں گے، جن میں انفراسٹرکچر کی بہتری، انسانی وسائل کی ترقی، قومی تشخص کا فروغ، اور مستقبل کے ترقی یافتہ پاکستان کے لئے وسائل کی فراہمی اور سرمایہ کاری شامل ہے۔ پروفیسر احسن اقبال نے کہا کہ اگرچہ چیلنجز بہت بڑے ہیں، مگر حکومت پاکستان ہر شعبے پر توجہ دے رہی ہے تاکہ عوام کی فلاح و بہبود کو یقینی بنایا جا سکے۔ ان کا کہنا تھا کہ آنے والے مالی سال میں زمینی حقائق اور چیلنجز کو سامنے رکھتے ہوئے وزارتِ منصوبہ بندی نے ترقیاتی بجٹ کو از سر نو ترتیب دینے کا فیصلہ کیا ہے۔ ہم وسائل کے درست استعمال پر توجہ دے رہے ہیں تاکہ اہم منصوبے جاری رہیں اور اڑان پاکستان وژن اور وفاقی حکومت کی ترجیحات کے مطابق ترقی کے سفر کو آگے بڑھایا جا سکے۔ یہ حکمتِ عملی ہمیں آئندہ مالیاتی منظرنامے میں بہتر انداز سے آگے بڑھنے میں مدد دے گی۔

اسلام آباد (این این آئی)نائب وزیراعظم اور وزیرخارجہ اسحاق ڈار نے چین اور متحدہ عرب امارات کے وزرائے خارجہ کو فون کرکے بھارت کے ساتھ ہونے والی پیش رفت سے آگاہ کردیا۔دفترخارجہ سے جاری بیان کے مطابق نائب وزیراعظم اور وزیر خارجہ اسحاق ڈار نے متحدہ عرب امارات کے ہم منصب شیخ عبداللہ بن زاید سے رابطہ کیا اور اس موقع پر اماراتی وزیرخارجہ نے پاکستان اور بھارت کے درمیان جنگ بندی کا خیرمقدم کیا۔نائب وزیراعظم نے خطے میں امن و استحکام کے لیے متحدہ عرب امارات کی سفارتی کوششوں کو سراہا۔دفترخارجہ کے مطابق نائب وزیراعظم اور وزیر خارجہ اسحاق ڈار نے چین کے وزیر خارجہ وانگ ژی سے بھی رابطہ کیا اور اسحاق ڈار نے بھارتی جارحیت اور پاکستان کے ردعمل پر وانگ ژی کو آگاہ کیا۔چینی وزیرخارجہ وانگ ژی نے پاکستان کے تحمل اور ذمہ دارانہ رویے کو سراہا اور کہا کہ چین پاکستان کے ساتھ خودمختاری، علاقائی سالمیت اور قومی خودمختاری کے تحفظ کے لیے کھڑا ہے۔اس موقع پر دونوں رہنماں نے قریبی رابطے اور آئندہ دنوں میں مسلسل ہم آہنگی پر اتفاق کیا۔