لاہور (ا ین این آئی)وزیر اعلیٰ پنجاب مریم نواز شریف نے یومِ آزادی صحافت پر اپنے پیغام میں کہاہے کہ آزادی صحافت جمہوری معاشرے کی بنیاد اورزندہ قوم کی پہچان ہے۔آزاد، خودمختار اور ذمہ دار میڈیا ہی وہ طاقت ہے جو حکمرانوں کو جوابدہ بناتا ہےـآزادی صحافت کے لئے صحافی برادری کی کاوشیں اور قربانیاں قابل تحسین ہیں۔ وزیراعلی مریم نوازشریف نے کہاکہ جمہوریت اور آزادی صحافت ایک دوسرے سے جُڑے ہوئے ہیں۔صحافت آزاد اور ذمہ دار ہو تو جمہوریت مضبوط ہوتی ہےـآزادی صحافت کی جدو جہد میں ساتھ ہیں،صحافیوں کے تحفظ کے لئے بھرپور اقدامات کو بھی یقینی بنایا جا رہا ہےـوزیراعلی مریم نوازشریف نے کہاکہ صحافی برادری کے لیے”اپنے گھر”کا خواب پورا کرنے کیلئے کوشاں ہیںـجمہوریت کی سر بلندی کے سفر میں اہل صحافت کے ساتھ ہیں۔

لاہور( این این آئی)امیر جماعت اسلامی حافظ نعیم الرحمن نے ادارہ نور حق میں پریس کانفرنس سے خطاب کرتے ہوئے پہلگام میں بھارت کے فالس فلیگ آپریشن پر امریکی نائب صدر کے بیان کی شدید مذمت کی اور حکومت ِ پاکستان سے مطالبہ کیا ہے کہ وہ امریکی سفیر کو طلب کرے اور پوچھے کہ ان کے نائب صدر نے بغیر تحقیقات کے یہ بیان کیسے دیا ؟ بھارت پہلگام واقعے پر پاکستان کے تحقیقات کے مطالبے سے بھاگ رہا ہے ، امریکی نائب صدر کے بیان سے تاثر ملتا ہے کہ امریکہ بھارت کے موقف کو درست تسلیم کر رہا ہے ، ہم اس موقع پر اپنے دوست ملک چین کی حمایت کو بھی خراج تحسین پیش کرتے ہیں ،اس وقت قومی یکجہتی کی سب سے زیادہ ضرورت ہے ، ہمیں بلوچستان کے زخموں پر مرہم رکھنا ہوگا ، 26اپریل کو فلسطین کے لیے کی جانے والی ملک گیر شٹر ڈائون ہڑتال میں پورا بلوچستان بند تھا ، ہمیں بلوچوں کو ان کے حقوق دینے ہوں گے ، لاپتہ افراد کا مسئلہ حل کرنا ہوگا ۔پاک بھارت کشیدگی کی صورتحال میں مسئلہ فلسطین و اہل غزہ کو نظر انداز نہیں کیا جا سکتا ، دونوں محاذوں پر کام کرنا ہوگا ، اسرائیل اور بھارت دونوں کو امریکی حمایت حاصل ہے اور تینوں کا ایک شیطانی اتحاد ہے ، بڑے شہروں میں ملین مارچ اور 26اپریل کی ملک گیر شٹر ڈائون ہڑتال کے بعد 17مئی کو ایبٹ آباد اور 18مئی کو مالا کنڈ میں عظیم الشان اور تاریخی ”یکجہتی غزہ مارچ” کیا جائے گا اور صہیونی مصنوعات کے بائیکاٹ کی مہم بھی تیز اور موثر بنائی جائے گی ۔ کراچی ملک کا اقتصادی حب ہے لیکن اس کے ساتھ پیپلز پارٹی کی سندھ حکومت بدترین سلوک کر رہی ہے اور پیپلز پارٹی کی کراچی دشمنی مسلسل جاری ہے ، کے فور منصوبہ تاحال نا مکمل ہے ، ہائیڈرینٹس کو تو پانی مل جاتا ہے لیکن شہریوں کے گھروں کے نلکوں میں پانی نہیں آتا اور عوام مہنگے داموں ٹینکر خریدنے پر مجبور ہیں ۔ پچھلے چار دن سے آدھے شہر کا پانی بند ہے اور لوگ شدید اذیت کا شکار ہیں ،8ماہ میں 6مرتبہ پانی کی بڑی لائین پھٹ چکی ہیں ، سندھ حکومت، واٹر بورڈ ، مرتضیٰ وہاب کہاں ہیں ؟ ٹائون کو فنڈز نہیں دیئے جارہے اور پیپلز پارٹی اختیارات نچلی سطح تک منتقل کرنے پر تیار نہیں ، کنالز کے معاملے پر ہم نے بھر پور آواز اُٹھائی ہے ، اس پر نظر ثانی کرنا اچھا اقدام ہے اس حوالے سے متبادل طریقے اختیار کرنے کی ضرورت ہے ، سندھ میں جو پانی آرہا ہے اس کی مناسب تقسیم کا کوئی نظام نہیں ہے ، پیپلز پارٹی کے وڈیرے سیلابی صورتحال میں پانی کا رخ دوسری طرف کر دیتے ہیں اور جب خشک سالی ہوتی ہے تو سارا پانی کھینچ کر اپنے پاس لے آتے ہیں جس سے عام لوگوںکا بُرا حال ہو جاتا ہے ۔حافظ نعیم الرحمن نے مزید کہا کہ 3مئی کو صحافت کا عالمی دن منایا جاتا ہے ، اس موقع پر ہمیں غزہ کے صحافیوں کو ضرور یاد رکھنا چاہیے ،غزہ میں 211صحافی جاں بحق ہوچکے ہیں ،جن میں 28خواتین صحافی بھی شامل ہیں ، انہو ں نے کہاکہ ہر آنے والی حکومت صحافت پر حملہ آور ہوتی ہے اور صحافیوں کی آواز دبانے کی کوشش کرتی ہے ، ہم سمجھتے ہیں کہ صحافت کو غیر جانبدار ہونا چاہیے ،ہم صحافی برادری کو خراج تحسین پیش کرتے ہیں جو اپنی جان ہتھیلی پر رکھ کر اپنی ذمہ داریاں انجام دیتے ہیں ،جماعت اسلامی کا بہت واضح موقف ہے کہ تمام میڈیا ورکرز کو ان کے بنیادی حقوق ملنے چاہیں ۔امیر جماعت نے کہا کہ غزہ میں امریکی سرپرستی میں اسرائیلی دہشت گردی جاری ہے ،وہاں اب تک تقریباََ52ہزار افراد شہید ہوچکے ہیں ، افسوس کہ مسلم دنیا کے حکمران اپنے اقتدار کے خاطر امریکہ کے آگے سربسجود ہیں ،اسرائیل نے اب شام پر بھی بمباری شروع کردی ہے اوروہ وہاں مختلف سازشیں کرکے خانہ جنگی کروانا چاہتا ہے ، وہ لبنان پر بھی حملے کررہا ہے اور ایران کو اس نے نشانے پر رکھا ہوا ہے ، اسرائیل صہیونیوں کی بات کرتا ہے اور بھارت ہندوتوا کی اور ان دونوں کو امریکہ کی حماعت حاصل ہے ، بد قسمتی سے ہمارے ملک کی پالیسیاں امریکہ کے حکم پر بنتی ہیں ،ہماری معیشت اس کے یہاں گروی ہے ، جماعت اسلامی نے پاکستان میں اسرائیل کے خلاف احتجاج کو ازسرنو منظم کیا ہے اوراہل غزہ سے یکجہتی و بائیکاٹ مہم تیزی سے جاری ہے جبکہ دوسری جانب الخدمت کی امدادی سرگرمیاں بھی جاری ہیں اور اہل غزہ کے لیے امدادی سامان روانہ کیا جا رہا ہے ، اسرائیل نے فلوٹیلا آرگنائزیشن جو امدادی سامان لے کر جارہی تھی پر مالٹا کے قریب حملہ کیا ہے ،ہم اس کی شدید مذمت کرتے ہیں ۔حافظ نعیم الرحمن نے کہاکہ بھارت نے پہلگام میں اپنے ہی سیاحوں کو قتل کرکے جو فالس فلیگ آپریشن کیاہے یہ پہلا آپریشن نہیں ہے ، اس سے پہلے بھی یہ کبھی تاج ہوٹل کبھی پارلیمنٹ پر حملہ کروا چکا ہے ، کبھی یہ الفاران نامی تنظیم بناکر سیاحوں کو اغوا اور کبھی سکھوں کا قتل کرواتا ہے ، بھارت پاکستان کے غیر جانبدارانہ تحقیقات کے مطالبے سے بھاگ رہا ہے ، بھارت کی آبی دہشت گردی کا تو کوئی تذکرہ ہی نہیں کررہا، بھارت نے بین الاقوامی قوانین کی خلاف ورزی کرتے ہوئے سندھ طاس معاہدے کو معطل کیا ہے ،اس معاہدے کو یکطرفہ طور پر معطل نہیں کیاجاسکتا ، اس حوالے سے پاکستان کواپنی سفارتی کوششیں تیز کرنی چاہیئے ،پاکستان جب سے امریکہ کی جنگ میں کودا ہے ، یہاں پر بم دھماکے ،ڈرون حملے ہونے لگے ، ریمنڈ ڈیوس جیسے کرداریہاں آکر اپنا کھیل کھیلنے لگ گئے، قوم کی بیٹی ڈاکٹر عافیہ کو امریکہ کے حوالے کردیا گیا ، امریکی جنگ میں کودنے کے بعد پاکستان میں ایک لاکھ سے زائد لوگ قتل ہوچکے ہیں جس میں ہماری فوج کا بھی بہت بڑا نقصان ہوا ہے ، معیشت کو تقریباًدوسو ملین ڈالر کا نقصان ہوچکا ہے ۔ پریس کانفرنس میں امیر جماعت اسلامی کراچی منعم ظفرخان، نائب امیر واپوزیشن لیڈر کے ایم سی سیف الدین ایڈوکیٹ،ایم پی اے محمد فاروق،نائب امیر کراچی راجہ عارف سلطان،سیکرٹری کراچی توفیق الدین صدیقی ، سینئر ڈپٹی سیکریٹری اطلاعات صہیب احمد ، سیکریٹری پبلک ایڈ کمیٹی نجیب ایوبی ، کے الیکٹرک کمپلنٹ سیل کے نگراں عمران شاہد و دیگر بھی موجود تھے۔

اسلام آباد(این این آئی)نائب وزیراعظم و وزیر خارجہ اسحق ڈار کے ساتھ ٹیلی فونک گفتگو میں یونانی وزیر خارجہ جارج گیراپیٹرائٹس نے پہلگام واقعے کی غیرجانبدارانہ اور شفاف انکوائری کیلئے پاکستان کی تجویز کا خیرمقدم کیاہے۔تفصیلا ت کے مطابق اسحق ڈار نے یونان کے وزیر خارجہ جارج گیراپیٹرائٹس سے ٹیلی فونک گفتگو کی۔اسحق ڈار نے ہم منصب کو موجودہ علاقائی صورتحال سے آگاہ کرتے ہوئے کہا کہ پاکستان بھارت کے بے بنیاد الزامات، گمراہ کن اطلاعات کی مہم اور یکطرفہ غیر قانونی اقدامات کو یکسر مسترد کرتا ہے، جن سے علاقائی امن و سلامتی اور استحکام شدید خطرات سے دوچار ہو گئے ہیں۔نائب وزیراعظم نے بھارت کی طرف سے عالمی قوانین کی سنگین خلاف ورزی کرتے ہوئے سندھ طاس معاہدے کو یکطرفہ طور پر معطل کرنے کے فیصلے کی شدید مذمت کی۔اسحق ڈار نے خود مختاری اور قومی مفادات یقینی بناتے ہوئے علاقائی امن و استحکام کیلئے پاکستان کے عزم کا اعادہ کیا۔انہوں نے حقائق معلوم کرنے کیلیے پہلگام واقعے کی آزادانہ اور شفاف تحقیقات کی پاکستان کی پیشکش کو دہرایا۔یونانی وزیر خارجہ نے کشیدگی میں اضافے سے بچنے اور امن و استحکام کیلئے صبر و تحمل کی اہمیت پر زور دیا۔جارج گیراپیٹرائٹس نے واقعے کی غیرجانبدارانہ اور شفاف انکوائری کیلئے پاکستان کی تجویز کا خیرمقدم کیا۔اعلامیے کے مطابق دونوں رہنماؤں نے اقوام متحدہ کی سلامتی کونسل کے غیر مستقل رکن کی حیثیت سے اپنی ذمہ داریوں سمیت خصوصا کثیر ملکی فورمز میں بدلتی ہوئی علاقائی اور عالمی صورتحال کے بارے میں قریبی رابطہ رکھنے پر اتفاق کیا۔

اسلام آباد (این این آئی)وزیر دفاع خواجہ آصف کی زیر صدارت اجلاس میں پاک بھارت کشیدگی کے تناظر میں ملکی صورتحال پر مشاورت کی گئی۔پارلیمنٹ ہاؤس اسلام آباد میں ہونے والے مشاورتی اجلاس میں جس میں وزیر قانون اعظم نذیر تارڑ، وزیر پارلیمانی امور طارق فضل چوہدری اور وزیر مملکت بیرسٹر عقیل شریک ہوئے۔ اجلاس میں پاک بھارت کشیدگی کے تناظر میں ملکی صورتحال اور حکومتی موقف پر مشاورت کی گئی۔ذرائع کے مطابق قومی سلامتی سے متعلق امور پر قومی اتفاق رائے پیدا کرنے اور اپوزیشن سیبات چیت پر بھی مشاورت کی گئی اور پارلیمنٹ کا اجلاس بلانے پر بھی غور کیا گیا۔ذرائع کے مطابق قومی اسمبلی کا اجلاس پانچ مئی کو طلب کرنے کا فیصلہ کیا گیا ہے۔ ذرائع کے مطابق اجلاس میں قانون سازی سمیت دیگر نکات پر مشاورت کی گئی، قومی اسمبلی میں بھارت کے خلاف مذمتی قرار داد لانے اور اس کے مسودہ پر بھی مشاورت کی گئی۔

اسلام آباد(این این آئی)پی ٹی اے نے وضاحت جاری کی ہے کہ یوٹیوب کی بندش کے حوالے سے جو نوٹس سوشل میڈیا پر گردش کر رہا ہے، وہ 2012کا ہے اور موجودہ حالات سے اس کا کوئی تعلق نہیں۔پی ٹی اے کی جانب سے جاری بیان میں کہا گیا کہ حالیہ دنوں میں ایک پرانی پریس ریلیز سوشل میڈیا پر دوبارہ شیئر کی جا رہی ہے جس سے عوام میں یوٹیوب کی موجودہ حیثیت کے بارے میں غلط فہمیاں پیدا ہو رہی ہیں۔بیان میں کہا گیا کہ پی ٹی اے واضح کرتا ہے کہ جو مواد گردش کر رہا ہے وہ پرانا ہے اور موجودہ حالات سے اس کا کوئی تعلق نہیں ہے، پی ٹی اے کی جانب سے یوٹیوب یا کسی بھی دیگر سوشل میڈیا پلیٹ فارم کو بلاک یا بند کرنے کیلئے کوئی ہدایات جاری نہیں کی گئیں۔عوام کو مشورہ دیا گیا ہے کہ درست معلومات کیلئے صرف پی ٹی اے کی آفیشل ویب سائٹ اور تصدیق شدہ سوشل میڈیا اکاؤنٹس پر انحصار کریں۔

اسلام آباد (این این آئی)وزیراعظم محمد شہباز شریف نے ملک میں توانائی کی پیداوار اور پانی کے وافر ذخیرے کا موثر نظام قائم کرنے کے لیے دیامر بھاشا ڈیم جیسے منصوبوں کو ترجیحی بنیادوں پر مکمل کرنے کی ہدایت کرتے ہوئے کہا ہے کہ توانائی کے منصوبوں کی تکمیل میں کسی بھی قسم کی تاخیر نا قابل قبول ہے۔جمعرات کو وزیر اعظم آفس کے میڈیا ونگ سے جاری پریس ریلیز کے مطابق وزیراعظم محمد شہباز شریف کی زیر صدارت ملک میں بجلی کے نرخوں میں کمی اور توانائی کے شعبے میں پائیدار اصلاحات کے حوالے سے انٹیگریٹڈ جنریشن کپیسٹی ایکسپنشن پلان (آئی جی سی ای پی 2024ـ2034) کا اجلاس منعقد ہوا۔اس موقع پر اظہار خیال کرتے ہوئے وزیراعظم نے کہا کہ بجلی کے نرخوں میں حالیہ تقریبا ساڑھے سات روپے کمی کے بعد حکومت پاکستان عوام کی مزید سہولت کے لیے شعبہ توانائی میں پائیدار اصلاحات کے لیے ایک موثر حکمت عملی پر عمل پیرا ہے۔وزیراعظم نے ملک میں توانائی کی پیداوار اور پانی کے وافر ذخیرے کا موثر نظام قائم کرنے کے لیے دیامر بھاشا ڈیم جیسے منصوبوں کو ترجیحی بنیادوں پر مکمل کرنے کی ہدایت کرتے ہوئے کہا کہ توانائی کے منصوبوں کی تکمیل میں کسی بھی قسم کی تاخیر نا قابل قبول ہے۔وزیراعظم نے کہا کہ ملک میں عنقریب بجلی کی پیداوار کے لیے فری مارکیٹ قائم کی جائے گی،مارکیٹ کے قیام سے مسابقتی بنیاد پر بجلی کی فراہمی ممکن ہو گی جو کہ بجلی کی پائیدار فراہمی اور نرخوں میں مزید کمی کا باعث بنے گی۔اجلاس میں وزیراعظم کو توانائی کے شعبے میں اصلاحات کے حوالے سے آگاہ کیا گیا۔ بریفنگ میں بتایا گیا کہ وزیر اعظم کی ہدایت پر جب آئی جی سی ای پی کا دوبارہ جائزہ لیا گیا تو یہ بات سامنے آئی کہ اس میں مزید بہتری کی گنجائش ہے، وزارت توانائی نے دن رات محنت کرنے کے بعد اس کو زمینی حقائق اور مستقبل کی ضروریات کے مطابق دوبارہ تیار کیا۔بریفنگ میں بتایا گیا کہ اگلے دس سالوں کے لیے بجلی کے پیداواری منصوبوں میں مسابقتی بولی اور کم ترین قیمت پر بجلی کی فروخت کے لیے راہ ہموار کی گئی ہے،کل 7967 میگا واٹ کے مہنگے منصوبوں کو بجلی کی پیدوار کے منصوبے(آئی جی سی ای پی) سے نکالا جا رہا ہے،بجلی کی پیداوار کے منصوبوں کی تاریخوں میں ردوبدل کیا جا رہا ہے۔ بریفنگ میں بتایا گیا کہ مہنگے منصوبوں کو پلان سے نکالنے اور منصوبوں کی تکمیل کی تاریخوں میں ردوبدل سے مجموعی طور پر 17 ارب ڈالر (4743 ارب روپے)کی بچت ہوگی،بجلی کی پیداوار کے لیے مقامی ذخائر اور شمسی، نیوکلیئر اور پن بجلی جیسے متبادل ذرائع کو درآمدی ایندھن پر ترجیح دی جائے گی۔بریفنگ میں بتایا گیا کہ اس حکمت عملی سے زر مبادلہ کے ذخائر میں کئی ارب ڈالر کی بچت ہو گی،حکومت کی جانب سے بجلی کی خریداری اور بجلی بنانے والی کمپنیوں کو کپیسٹی پیمنٹ رفتہ رفتہ ترک کر دی جائیں گی۔وزیراعظم نے وفاقی وزیر پاور سردار اویس لغاری اور ان کی ٹیم کو ملک کیلئے 4743 ارب روپے کی بچت کو سراہا اور اس کو ایک اور تاریخی کامیابی قرار دیا۔اجلاس میں وزیر توانائی سردار اویس لغاری، وزیر اقتصادی امور احد خان چیمہ،وزیر اطلاعات و نشریات عطاء اللہ تارڑ، وزیر پٹرولیم علی پرویز ملک اور متعلقہ اداروں کے اعلیٰ افسران شریک تھے۔