ممبئی (این این آئی)بالی وڈ فلموں میں جہاں اداکارائوں کو عموما رومانوی اور دلکش کردار دیے جاتے ہیں، وہیں بعض اوقات انہیں روایتی تصور سے ہٹ کر کرداروں کی پیشکش بھی ہوتی ہے۔لیکن اکثر دیکھا گیا ہے کہ معروف اداکارائیں ایسی آفرز قبول کرنے سے گریز کرتی ہیں، خاص طور پر جب انہیں کسی بڑے ہیرو کی بہن کا کردار ادا کرنے کو کہا جائے۔ایسا ہی ایک دلچسپ واقعہ سن 2000میں ریلیز ہونے والی فلم”جوش”کے دوران سامنے آیا، جب ہدایتکار منصور خان نے ایک مشہور اداکارہ کو شاہ رخ خان کی جڑواں بہن کا کردار آفر کیا اور ان کا ردعمل سب کو حیران کر گیا۔فلمساز منصور خان، جو قیامت سے قیامت تک اور جو جیتا وہی سکندر جیسی کلاسک فلموں کے لیے جانے جاتے ہیں، نے حالیہ انٹرویو میں اپنی 2000کی فلم جوش کے حوالے سے کچھ دلچسپ انکشافات کیے ۔ اس فلم میں شاہ رخ خان اور ایشوریا رائے نے جڑواں بہن بھائی کا کردار ادا کیا تھا، لیکن ابتدا میں فلم کی کاسٹ بالکل مختلف ہونی تھی۔ بھارتی میڈیا کے مطابق جوش فلم کے ہدایتکار منصور خان نے حالیہ انٹرویو میں انکشاف کیا کہ انہوں نے فلم میں شاہ رخ خان کی جڑواں بہن کا کردار پہلے کاجول کو آفر کیا تھا۔منصور خان نے بتایا کہ میں نے جیسے ہی کاجول کو شاہ رخ کی بہن کے کردار کی تفصیل سنائی تو کاجول نہ صرف حیران ہوئیں بلکہ فلم کی آفر پر شدید ردعمل بھی دیا۔ ہدایتکار منصور کے مطابق کاجول نے اسکرپٹ سننے کے بعد کہا کہ وہ یہ فلم بالکل نہیں کریں گی کیونکہ وہ میکس یعنی شاہ رخ کے کردار کو ادا کرنا چاہتی تھیں، جو فلم کا سب سے زیادہ دلکش رول تھا۔ نہ کہ شاہ رخ کی بہن کاکردار کریں۔اس انکار کے بعد منصور نے جب ایشوریا رائے سے رابطہ کیا تو انہوں نے بغیر کسی ہچکچاہٹ کے بہن کا کردار قبول کر لیا۔ ہدایتکار منصور خان کا کہنا ہے کہ ایشوریا نے اسکرپٹ کو کہانی کے طور پر دیکھا، کسی رول کی بڑی یا چھوٹی حیثیت پر بات نہیں کی۔ وہ بہت پروفیشنل تھیں اور میرے نزدیک ”جوش”میں ایشوریا کی پرفارمنس ان کی بہترین پرفارمنسز میں سے ایک تھی۔یاد رہے کہ کاجول اس سے قبل دل والے دلہنیا لے جائیں گے اور کچھ کچھ ہوتا ہے جیسی مشہور فلموں میں شاہ رخ کی ہیروئن بنی تھیں اور دونوں کی جوڑی کا شمار بالی وڈ کی مشہور جوڑیوں میں ہوتا ہے۔

کراچی (این این آئی)فیصل رحمن نے فیصل قریشی کو ورسٹائل اداکار ، عدنان صدیقی کو بہترین ماڈل قرار دے دیا۔ایک انٹرویو میں فیصل رحمن نے کہا کہ دانش تیمور میں فلمی صلاحیت موجود ہے لیکن انہیں ایک زبردست سکرپٹ اور ہنر مند ہدایتکار کی ضرورت ہے تاکہ وہ اپنی پوری صلاحیت دکھا سکیں۔انہوں نے کہاکہ ہمایوں سعید چونکہ خود پروڈیوسر بھی ہیں، اس لئے وہ فلمیں کر سکتے ہیں اور ان کیلئے مواقع موجود ہیں۔عمران عباس سے متعلق فیصل رحمن نے کہا کہ وہ بھی فلمی میٹریل ہیں، لیکن انہیں چاہئے بالوں کو چہرے سے ہٹا کر رکھیں تاکہ ان کا چہرہ زیادہ نمایاں ہو۔فہد مصطفی کے بارے میں ان کی رائے کچھ یوں تھی کہ وہ ایک ہمہ جہت فنکار ہیں، صرف اداکار نہیں اور یہی ان کی خوبی ہے، تاہم فیصل نے وضاحت کی کہ وہ روایتی فلمی مٹیریل نہیں ہیں، مگر ان کی شخصیت ایسی ہے جو لوگوں کو پسند آتی ہے۔فیصل رحمان نے فیصل قریشی کو ورسٹائل اداکار قرار دیتے ہوئے کہا کہ ان جیسا آل رائونڈر کم ہی دیکھنے کو ملتا ہے۔احسن خان کے بارے میں انہوں نے اعتراف کیا کہ وہ ان کے کام سے زیادہ واقف نہیں ہیں، جبکہ نعمان اعجاز کو پہلے تو وہ پہچان ہی نہیں سکے اور بعد میں بھی ان کے کام کو یاد کرنے میں مشکل پیش آئی۔آخر میں عدنان صدیقی کے بارے میں فیصل رحمن نے کہا کہ وہ ایک بہترین ماڈل ہیں، لیکن بطور اداکار انہیں بہت زیادہ متاثر نہیں کر سکے۔

کراچی (این این آئی)پاکستان شوبز کی اداکارہ سنیتا مارشل نے کہاہے کہ لوگ اکثر مجھے کہتے ہیں کہ میرا چہرہ ماہرہ خان سے ملتا ہے۔نجی ٹی وی پروگرام میں میزبان اشنا شاہ نے سنیتا مارشل کی اداکارہ ماہرہ خان سے مشابہت پر سوال کیا۔جس پر سنیتا مارشل نے انکشاف کیا کہ اکثر ایسا ہوتا ہے کہ لوگ انہیں ماہرہ خان سے ملاتے ہیں وہ کہتے ہیں کہ میں ماہرہ سے ملتی ہوں۔اشنا شاہ نے کہا کہ آپ کے ہونٹ ماہرہ خان سے ملتے ہیں جو خوبصورت ہیں۔ سنیتا نے کہاکہ میرے ہونٹ بڑے ہیں شائد اسی لئے ماہرہ جیسی لگتی ہوں۔

ممبئی (این این آئی)بھارتی سپر سٹار، اداکارہ و ماڈل کترینہ کیف کی بہن ازابیل کیف نے پہلی بالی ووڈ فلم کا ٹیزر ریلیز کر دیا گیا۔میڈیارپورٹ کے مطابق ازابیل کیف نے رومانوی مزاحیہ فلم سسواگتم خوش آمدید کے ذریعے بطور مرکزی اداکارہ فلمی دنیا میں انٹری دی ہے۔فلم میں ازابیل کیف کے ساتھ پلکت سمرات مرکزی کردار میں جلوہ گر ہوں گے، ریلیز ہونے والا ٹیزر فلم کی ہنسی مذاق سے بھرپور اور محبت بھری کہانی کی جھلک پیش کرتا ہے۔فلم کی ہدایتکاری دھیرج کمار نے کی ہے اور کہانی ایک ایسی محبت کے گرد گھومتی ہے جو ثقافتی حدود کو عبور کرتی ہے، فلم میں مزاح، جذبات اور ایک خوبصورت سماجی پیغام کو دلکش انداز میں پیش کیا گیا ہے۔ سسواگتم خوش آمدید کو 16مئی 2025ء کو سنیما گھروں میں ریلیز کیا جائے گا۔پلکت سمرات نے فلم کا ٹیزر سوشل میڈیا پر شیئر کرتے ہوئے لکھا ہے کہ دو دل، دو ثقافتیں، ایک بے مثال محبت کی کہانی۔فلم کی کاسٹ میں پلکت سمرات اور ازابیل کیف کے علاوہ سہیل وید، پرینکا سنگھ، آنجہانی رتوراج سنگھ، میگھنا ملک اور ارون بالی بھی شامل ہیں۔

لاہور ( این این آئی)کمشنر لاہور زید بن مقصود کی زیر صدارت کل (جمعرات )24اپریل سے لاہور قذافی اسٹیڈیم میں کھیلے جانے والے پاکستان سپر لیگ 10کے اگلے میچز کے انتظامات کے حوالے سے اجلاس منعقد ہوا۔کمشنر لاہور نے پی ایس ایل میچز کے حوالے سے پی سی بی، ضلعی انتظامیہ اور تمام متعلقہ محکموں سے تیاریوں پر تفصیلی بریفنگ لی۔ ضلعی انتظامیہ نے انتظامات بارے بریفنگ دیتے ہوئے کہا کہ قذافی سٹیڈیم میچز کے لئے ریسکیو 1122کیمپ، فیلڈ ہسپتال، کنٹرول رومز اور سی سی ٹی وی کیمروں سے مانیٹرنگ سنٹرز قائم ہونگے، پی سی بی کنٹرول روم کے علاوہ خصوصی کنٹرول رومز بنیں گے، قزافی سٹیڈیم کے باہر 4پارکنگ سائٹس ہونگی، دو نشتر کمپلیکس میں ہونگی، لیپارک انتظامات کو یقینی بنائے گی، ریسکیو 1122کے اہلکار و ایل ڈبلیو ایم سی کے ورکرز پی ایس ایل میچز کیلئے ان سائیڈ و آئوٹ سائیڈ موجود ہونگے۔کمشنر لاہور نے ضلعی انتظامیہ کو ہدایت دیتے ہوئے کہا کہ پاکستان سپر لیگ 10کے اگلے میچز 24اپریل سے لاہور قذافی اسٹیڈیم میں ہونگے، تمام متعلقہ محکمے شیڈول اور طریقہ کار کے مطابق پی ایس ایل میچز کے کامیاب انعقاد کو یقینی بنائیں۔انہوں نے کہا کہ ٹریفک پولیس ٹریفک فلو کو برقرار رکھنے کے لئے ٹریفک پلان ترتیب دے اور شہریوں کو ٹریفک پلان بارے رہنمائی دی جائے، ٹریفک پولیس سٹریٹیجی ترتیب دیں کہ ٹیمز کی موومنٹ کے دوران شہریوں کو آمدورفت میں کم سے کم مشکل کا سامنا ہو، کمشنر لاہور نے مزید کہا کہ سٹیڈیم کے اندر اشیائے خورونوش کی قیمتوں اور سٹینڈرڈز پر سخت چیک لگائیں۔کمشنر لاہور کی ہدایت پر بعد ازاں ایڈیشنل کمشنر عبدالسلام عارف نے بھی انتظامات کے حوالے سے تمام محکموں سے بریفنگ لی۔اجلاس میں پولیس، ضلعی انتظامیہ، ٹریفک پولیس، ریسکیو 1122، پی سی بی افسران سمیت تمام متعلقہ محکموں کے افسران نے شرکت کی۔