لاہور(این این آئی)معروف پاکستانی یوٹیوبر ڈکی بھائی کے خلاف نیشنل ہائی ویز اینڈ موٹرویز پولیس نے کارروائی کا آغاز کردیا۔تفصیلات کے مطابق سوشل میڈیا پر شیئر کی گئی ویڈیو میں انہیں ہائی وے پر ڈرائیونگ کے دوران اپنی گاڑی کو آٹو موڈ پر لگا کر گاڑی کے اسٹیئرنگ پر ٹانگیں رکھ کر سوتے ہوئے دیکھا گیا تھا۔ڈکی بھائی کی یہ ویڈیو سوشل میڈیا پر وائرل ہوئی تو صارفین کی بڑی تعداد نے انہیں شدید تنقید کا نشانہ بنایا اور یوٹیوبر کے اس اقدام کو غیر ذمے دارانہ قرار دیتے ہوئے ان کی گرفتاری کا مطالبہ کیا تھا۔صارفین نے نیشنل ہائی ویز اینڈ موٹرویز پولیس کو باضابطہ شکایات درج کروائی تھیں۔صارفین کی شکایات پر نیشنل ہائی ویز اینڈ موٹرویز پولیس نے ایکشن لیتے ہوئے یوٹیوبر سعد رحمن کے خلاف غفلت، لاپرواہی سے گاڑی چلانے اور اوور اسپیڈنگ کا مقدمہ درج کرلیا ۔ترجمان موٹروے پولیس کے مطابق ڈکی بھائی کی اسٹیئرنگ پر پاؤں رکھ کر گاڑی چلانے کی ویڈیو سامنے آئی تھی۔نیشنل ہائی ویز اینڈ موٹرویز پولیس نے اس حوالے سے سوشل میڈیا پر ویڈیو پیغام بھی جاری کیا ہے۔

کراچی(این این آئی)پاکستانی شوبز انڈسٹری کے معروف اداکار عمران اشرف کی طبیعت ناساز ہو گئی۔اداکار عمران اشرف نے فوٹو اینڈ ویڈیو شیئرنگ ایپلیکیشن انسٹاگرام کے اکاؤنٹ پر اپنی صحت سے متعلق مداحوں کے ساتھ اپ ڈیٹ شیئر کی ہے۔اداکار نے اسٹوری شیئر کرتے ہوئے بتایا کہ کچھ بہتر محسوس نہیں کر رہا ہوں۔عمران اشرف نے اسٹوری میں مداحوں سے اپیل کی ہے کہ مجھے دعاؤں کی ضرورت ہے، میری صحت یابی کیلئے دعا کریں۔

کراچی (این این آئی)بشری انصاری نے زارا نور عباس کے کلاسیکل ڈانس کی تعریفوں کے پل باندھ دیئے۔پاکستان کی سینئر اور ورسٹائل اداکارہ بشری انصاری حال ہی میں اپنی بھانجی زارا نور عباس کے کلاسیکل ڈانس کی تعریف کرنے پر سوشل میڈیا صارفین کی جانب سے تنقید کی زد میں آ گئیں۔زارا نور عباس معروف اداکارہ اسما عباس کی بیٹی اور بشری انصاری کی بھانجی ہیں، وہ اپنی اداکاری کے ساتھ ساتھ رقص سے بھی گہرا شغف رکھتی ہیں۔زارا نور عباس نے حال ہی میں اپنے انسٹاگرام اکانٹ پر ایک ویڈیو پوسٹ کی جس میں وہ کلاسیکل ڈانس کی ریہرسل کرتی دکھائی دے رہی ہیں۔ویڈیو کے کیپشن میں زارا نے بتایا ہے کہ حمل کے دوران میں نے ڈانس کرنا چھوڑ دیا تھا، لیکن اب دوبارہ مشق کر رہی ہوں، فی الحال میرے ڈانس میں مہارت اور نرمی کی کمی ہے، لیکن میں بہتر ہونے کی کوشش کر رہی ہوں۔مداحوں کی جانب سے ویڈیو کو کافی پزیرائی ملی، مگر کچھ صارفین نے تنقید بھی کی، خاص طور پر جب بشری انصاری نے کمنٹ سیکشن میں زارا کی حوصلہ افزائی کرتے ہوئے لکھا کہ یہ میری اچھی لڑکی ہے، پلیز اب اسے مت روکنا! ہفتے میں ایک بار مجھے آپ سے یہ فن چاہیے! ماشا اللہ۔

ممبئی (این این آئی)عالمی شہرت یافتہ اداکارہ پریانکا چوپڑا کی نئی ہالی ووڈ فلم ہیڈز آف اسٹیٹ کا سنسنی خیز ٹریلر جاری کر دیا گیا ہے، جس میں وہ عالمی سازش کے خلاف جان ہتھیلی پر رکھ کر لڑتی دکھائی دے رہی ہیں۔فلم میں ایکشن، ایڈونچر اور ہنسی کے تڑکوں کا زبردست امتزاج ہے، جس میں پریانکا کے ساتھ جان سینا، ادریس البا اور جیک کوائیڈ جیسے بڑے نام شامل ہیں۔فلم کی کہانی ایک بین الاقوامی مشن پر مبنی ہے، جہاں امریکی صدر (جان سینا)اور برطانوی وزیرِ اعظم (ادریس البا)دشمنوں کے نرغے میں پھنس جاتے ہیں، ان کی جان بچانے اور دنیا کو ایک بڑی تباہی سے بچانے کے لیے میدان میں آتی ہیں پریانکا چوپڑا بطور خفیہ ایجنٹ نوئل بسے، ٹریلر میں دکھائے گئے مناظر ہوش اڑا دینے والے ہیں، جن میں ہوائی جہاز پر حملہ، ایکشن سے بھرپور جھڑپیں اور 2 عالمی رہنماں کو بچانے کی سنسنی خیز جدوجہد شامل ہے۔فلم 2 جولائی 2025 کو پرائم ویڈیو پر ریلیز ہو گی اور ناظرین اسے انگریزی، ہندی، تمل، تیلگو اور ملیالم زبانوں میں دیکھ سکیں گے۔

ممبئی (این این آئی)پہلگام واقعے کے بعد پاکستان کے سپر اسٹار فواد خان کی بالی ووڈ فلم ابیر گلال کی ریلیز خطرے میں پڑگئی ہے۔مقبوضہ جموں و کشمیر میں منگل کے روز پیش آنے والے واقعے میں 26 افراد ہلاک ہوئے، جن میں زیادہ تر سیاح شامل تھے۔ اس واقعے کے بعد فواد خان اور بھارتی اداکارہ وانی کپور کی فلم شدید تنقید کی زد میں آ گئی ہے اور بھارت میں پاکستانی فنکاروں کے خلاف سخت ردعمل سامنے آ رہا ہے۔فلم ابیر گلال کا ٹیزر یکم اپریل کو جاری کیا گیا تھا، یہ فلم جو پہلے ہی تنقید کی زد میں تھی اب اس کی ریلیز اور کامیابی متاثر ہونے کا خدشہ ہے کیونکہ فلم کیخلاف سوشل میڈیا پر بائیکاٹ مہم کا آغاز کیا جاچکا ہے۔بھارتی شدت پسند حلقے کی جانب سے اس فلم میں فواد خان کو کاسٹ کرنے پر اعتراض کیا جا رہا ہے۔ بھارتی فلم اور ٹیلی ویژن ڈائریکٹرز ایسوسی ایشن کے صدر اشوک پنڈت نے فلم کی ریلیز کی مخالفت کرتے ہوئے کہا کہ یہ صرف ایک فلم نہیں بلکہ قومی سلامتی کا مسئلہ ہے۔ان کا کہنا تھا کہ پاکستانی فنکاروں کے ساتھ کام کرنا اس وقت قابلِ قبول نہیں جب ان کا ملک بھارت کے خلاف سرگرم ہو۔ یہی نہیں انہوں نے کرکٹ میچز اور بین الاقوامی شوز میں پاکستانی فنکاروں کی شرکت پر بھی سوالات اٹھائے۔دوسری جانب فیڈریشن آف ویسٹرن انڈیا سنی ایمپلائز (FWICE) کے صدر بی این تیواری نے بھی اعلان کیا کہ وہ ابیر گلال کی بھارت میں ریلیز کی اجازت نہیں دیں گے، اور اگر فلم ریلیز ہوئی تو سخت کارروائی کی جاسکتی ہے جبکہ عوام کی جانب سے بھی سخت ردعمل آئے گا۔یاد رہے کہ فواد خان فلم جو پہلے بھی کئی بھارتی فلموں میں کام کر چکے ہیں ابیر گلال کیساتھ طویل مدت کے بعد واپسی کر رہے تھے تاہم اب ان کی بالی ووڈ میں واپسی خطرے میں دکھائی دے رہی ہے۔

کراچی (این این آئی)ادکارہ بہنوں ایمن خان اور منال خان کے بھائی معاذ خان کی شادی کی تقریبات کا آغاز ہو گیا، مایوں کی خوبصورت تصاویر منظرِ عام پر آ گئیں۔پاکستان کی معروف اور باصلاحیت اداکارہ ایمن خان اور منال خان کے مداحوں کے لیے خوشخبری ہے، کیونکہ ان کے چھوٹے بھائی معاذ خان کی شادی کی تقریبات کا باقاعدہ آغاز ہو چکا ہے۔ گزشتہ برس معاذ خان کا نکاح صبا کے ساتھ ایک سادہ اور نجی تقریب میں انجام پایا تھا اور اب ان کی مایوں کی خوبصورت تقریب کراچی میں منعقد ہوئی ہے۔مایوں کی تقریب نہایت رنگا رنگ اور خوشیوں بھری تھی، جس میں خاندان کے قریبی عزیز و اقارب اور دوست احباب نے شرکت کی۔ایمن خان اس موقع پر نیلے رنگ کے دیدہ زیب لباس میں جلوہ گر ہوئیں، جس پر سنہری کڑھائی اور گوٹے کا کام کیا گیا تھا، ان کے انداز نے سوشل میڈیا پر خوب داد سمیٹی۔منال خان نے بھی روایت کے مطابق ایک خوبصورت آتشی گلابی اور سنہری جوڑا زیب تن کیا، جس میں وہ نہایت دلکش دکھائی دے رہی تھیں۔دولہا معاذ خان نے سفید روایتی کرتا شلوار پہنا، جبکہ دلہن صبا نے آتشی گلابی اور نیلے رنگ کے امتزاج سے تیار کردہ خوبصورت لباس کا انتخاب کیا، جو ان کے ذاتی برانڈ MK Wears کی تخلیق تھا۔ان کی جوڑی نہایت خوبصورت اور خوش باش نظر آئی اور سوشل میڈیا پر مداحوں کی جانب سے خوب پسند کی جا رہی ہے۔سوشل میڈیا پر ان لمحات کی تصاویر اور ویڈیوز تیزی سے وائرل ہو رہی ہیں۔مداح اس خوبصورت جوڑی کے لیے نیک تمناں کا اظہار کر رہے ہیں اور شادی کی دیگر تقریبات کے منتظر ہیں۔