لاہور (این این آئی)لاہور قلندرز کے کپتان شاہین شاہ آفریدی اور فاسٹ بولر حارث رئوف نے محمد عامر اور وہاب ریاض کو پیچھے چھوڑ دیا۔شاہین شاہ آفریدی اور حارث روف نے ٹی 20 کرکٹ میں اپنی 300،300 وکٹ مکمل کرلیں۔لاہور قلندرز سے تعلق رکھنے والے دونوں پلیئرز نے پی ایس ایل 10 میں لاہور اور اسلام آباد کے میچ کے دوران یہ سنگ میل عبور کیا۔شاہین آفریدی نے 300 وکٹیں کیریئر کے 216ویں اور حارث رئوف نے 228 ویں میچ میں مکمل کی ہیں۔اسلام آباد یونائیٹڈ کے خلاف میچ میں صاحبزادہ فرحان کی وکٹ لیتے ہی شاہین آفریدی 300 وکٹیں مکمل کرنے والے تیز ترین پاکستانی بولر بن گئے جبکہ حارث روف نے اس فہرست میں دوسری پوزیشن اپنے نام کرلی ہے۔اس سے قبل محمد عامر اور وہاب ریاض کے پاس مشترکہ طور پر یہ اعزاز تھا، دونوں نے 256،256 میچز میں اپنی 300 وکٹیں مکمل کی تھیں۔شاہین آفریدی 300 وکٹ لینے والے دنیا کے چوتھے تیز ترین بولر ہیں۔

لاہور(این این آئی)ایچ بی ایل پی ایس ایل 10 میں کراچی کنگز نے ملتان سلطانز کو 87 رنز سے شکست دے دی،یہ کراچی کنگز کی سات میچوں میں چوتھی کامیابی ہے۔ اس جیت کے بعد اس کے 8 پوائنٹس ہوگئے ہیں ، ملتان سلطانز کی 8 میچوں میں یہ 7 ویں شکست ہے اور اگر وہ اپنے اگلے دونوں میچ جیت بھی لے تب بھی اس کے 6 پوائنٹس ہونگے یوں وہ پلے آف کی دوڑ سے باہر ہوگئی ہے،قذافی اسٹیڈیم میں کراچی کنگز نے ٹاس جیت کر پہلے بیٹنگ کا فیصلہ کیا اور 20 اوورز میں 4 وکٹوں پر 204 رنز بنائے۔ملتان سلطانز 16 اعشاریہ ایک اوورز میں 117 رنز بناکر آؤٹ ہوگئی۔اوپنرز ٹم سائیفرٹ اور کپتان ڈیوڈ وارنر نے کراچی کنگز کو 53 رنز کا جارحانہ اسٹارٹ دیا۔ سائیفرٹ3 چوکوں اور ایک چھکے کی مدد سے22 رنز بناکر عبید شاہ کی گیند پر جارڈن کے ہاتھوں کیچ ہوگئے۔ڈیوڈ وارنر جو مائیکل بریسویل کے ایک ہی اوور میں 24 رنز اسکور کرچکے تھے 2 چھکوں اور4 چوکوں کی مدد سے30 رنز بناکر ڈیوڈ ولی کی گیند پر کامران غلام کے ہاتھوں کیچ ہوگئے۔ 60 کے مجموعی اسکور پر عمیر بن یوسف صرف ایک رن بناکر عبید شاہ کی گیند پر ڈیوڈ ولی کے ہاتھوں کیچ ہوئے۔ جیمز ونس اور عرفان خان نے چوتھی وکٹ کیلئے 78 رنز کا اضافہ کیا۔ عرفان خان 3 چھکوں اور 2 چوکوں کی مدد سے40 رنز بناکر کیمفر کی گیند پر جارڈن کے ہاتھوں کیچ ہوئے۔ جیمز ونس جنہوں نے ملتان سلطانز کے خلاف پہلے میچ میں سنچری اسکور کی تھی اس مرتبہ انہوں نے 65 رنز ناٹ آؤٹ کی اننگز کھیلی جس میں5 چوکے اور 2 چھکے شامل تھے۔انہوں نے خوشدل شاہ کے ساتھ پانچویں وکٹ کی شراکت میں 66 رنز کا اضافہ کیا۔ خوشدل شاہ نے آؤٹ ہوئے بغیر صرف 13 گیندوں پر 33 رنز اسکور کیے جس میں2 چوکے اور3 چھکے شامل تھے۔عبید شاہ نے 49 رنز دے کر 2 وکٹیں حاصل کیں۔ملتان سلطانّز کو ابتدا ہی میں کپتان محمد رضوان کا نقصان اٹھانا پڑا جو بغیر کوئی رن بنائے عباس آفریدی کی گیند پر سائیفرٹ کے ہاتھوں کیچ ہوگئے جس کے بعد وقفے وقفے سے وکٹیں گرتی رہیں اور ملتان سلطانز اپنے ہدف سے دور ہوتی چلی گئی۔عثمان خان ایک ، یاسر خان 26 کرٹس کیمفر 12 افتخار احمد 8 اور مائیکل بریسویل 2 رنز بناکر آؤٹ ہوئے۔کامران غلام ایک چھکے اور 2 چوکوں کی مدد سے 29 رنز بناکر ٹاپ اسکورر رہے۔کراچی کنگز کی طرف سے محمد نبی نے 14 رنز دے کر3 وکٹیں حاصل کیں۔خوشدل شاہ نے 26 اور میرحمزہ نے 15رنز دے کردو دو کھلاڑیوں کو آؤٹ کیا۔ملتان سلطانز اپنا 9 واں میچ 5 مئی کو پشاور زلمی اور 10 واں میچ 11 مئی کو کوئٹہ گلیڈی ایٹرز کے خلاف کھیلے گی۔ دونوں میچز ملتان کرکٹ اسٹیڈیم میں کھیلے جائیں گے۔

لاہور(این این آئی)پشاور زلمی کے کپتان بابر اعظم کا کہنا ہے کہ بولنا مجھے بھی آتا ہے، ہر کوئی بول سکتا ہے تو ہمیں بھی بولنا آتا ہے لیکن عزت نفس بھی کوئی چیز ہوتی ہے، مجھے میرے بڑوں نے سکھایا ہے کہ ہر کسی کی عزت کرنا ہے۔نجی ٹی وی کو خصوصی انٹرویو دیتے ہوئے بابر اعظم نے کہا کہ لوگ مجھے کریز پر زیادہ دیر تک دیکھنا چاہتے ہیں، لوگوں کی مجھ سے توقعات زیادہ ہوتی ہیں، میں اپنی چھوٹی اننگز سے بھی لطف اندوز ہوتا ہوں لیکن لوگوں کی توقع کے مطابق لمبا نہیں کھیل پا رہا۔انہوں نے کہا کہ مجھ سے غلطیاں ہوتی ہیں اور اگلی مرتبہ دور کرنے کی کوشش کرتا ہوں لیکن پھر کوئی اور غلطی ہو جاتی ہے، ایسا کرکٹ میں ہوتا رہتا ہے لیکن اہم بات یہ ہے کہ آپ کتنا فوکس رہتے ہیں میں اب بھی بہت فوکس ہوں، میں اپنی گیم کے مطابق چلتا ہوں۔بابر اعظم کا کہنا ہے کہ مجھے بھی اندازہ ہے کہ آج کل اسٹرائیک ریٹ اور تیز کھیلنے کی بات ہوتی ہے، مجھے پتہ ہے کہ کرکٹ کہاں جا رہی ہے، مجھے کسی کو ثابت نہیں کرنا کہ میں کیسا پلیئر ہوں، سب کو پتہ ہے، میں کیسا پلیئر ہوں، میں ہمیشہ صورتِ حال اور ٹیم کی ضرورت کے مطابق کھیلتا ہوں، اسٹرائیک ریٹ کا مجھے پتہ ہوتا ہے۔بابر اعظم کا کہنا ہے کہ جتنے بیٹنگ نمبر میں نے تبدیل کیے ہیں کسی نے نہیں کیے، کسی کے آنے پر بابر نے ہی نمبر تبدیل کیے ہیں، بابر کبھی نمبر 3 پر چلا جاتا ہے کبھی اوپن آجانا ہے، میرے لیے پاکستان پہلے ہے، فرنچائز کی ڈیمانڈ تھی اوپن کروں، پھر جو پاکستان کی ضرورت ہے وہاں کھیلتا ہوں، میرا کبھی اپنا انفرادی ہدف نہیں رہا کہ میں اوپنر ہی کھیلوں گا، میں ٹیسٹ میں اوپن کر چکا ہوں، میں نے 6 نمبر سے شروع کیا اور پھر اوپر نیچے ہوتا اوپنر تک آیا، میں نے کبھی نہیں کہا کہ اس نمبر پر نہیں کھیلوں گا کہ میری کارکردگی اچھی نہیں ہوگی، ٹیم کی ضرورت کے مطابق ہر نمبر پر کھیلنے کیلیے تیار ہوں۔بابر اعظم کا ماننا ہے کہ مجھے باتیں کرنا پسند نہیں ہیں، مجھے گراؤنڈ میں کھیلنا زیادہ پسند ہے، مجھے بولنا آتا ہے، ہر کوئی بول سکتا ہے تو ہمیں بھی بولنا آتا ہے لیکن عزت نفس بھی کوئی چیز ہوتی ہے، مجھے میرے بڑوں نے سکھایا ہے کہ ہر کسی کی عزت کرنا ہے، میرا کام گراؤنڈ میں ہے، میں سخت محنت گراؤنڈ میں کرتا ہوں، میں اپنی کارکردگی سے کبھی مطمئن نہیں ہوتا، میں نمبر ون رہا ہوں تو کبھی مطمئن نہیں ہوا میں اچھا پرفارم کر کے بھی بس آگے کا دیکھتا ہوں اور ملک کا سوچتا ہوں۔بابر اعظم نے کہا کہ میرے ٹی ٹوئنٹی کیریئر کے بارے میں سلیکٹرز اور کوچز کیا سوچ رہے ہیں وہی بتا سکتے ہیں، میرا کام پرفارم کرنا ہے، چاہے ٹی ٹوئنٹی ہو ون ڈے ہو یا ٹیسٹ کرکٹ، کھلانا نہ کھلانا میرے ہاتھ میں نہیں، جب تک اللّٰہ چاہے گا کھیلوں گا، ہمیں کہا گیا کہ ٹی ٹوئنٹی سے آرام دیا گیا ہے اب دیکھتے ہیں کہ وہ کیا سوچتے ہیں۔بابر اعظم نے کہا کہ ون ڈے کرکٹ کو ٹی ٹوئنٹی کرکٹ سے فرق نہیں پڑے گا ون ڈے فارمیٹ سے آپ کے صبر کا پتہ چلتا ہے ایسا نہیں ہے کہ ون ڈے کرکٹ تیز رفتار نہیں ہے، 350 پلس رنز بن رہے ہیں، ون ڈے فارمیٹ ہمیشہ سے میرے لیے خاص ہے، اچھی یادیں اور پرفارمنسز ہیں۔پشاور زلمی کے کپتان بابر اعظم نے کہا کہ پاکستان سپر لیگ (پی ایس ایل) ایک بہترین لیگ ہے، مجھے بالکل نہیں لگا کہ اس کا گراف گرا ہے، کسی میچ میں کہہ سکتے ہیں کہ دلچسپی کم ہوئی ہے لیکن مجموعی طور پر ایسا نہیں ہے، غیر ملکی کھلاڑی کوشش کرتے ہیں کہ پی ایس ایل کھیلیں، بولنگ کا معیار یہاں بہت اچھا ہے، ہر ٹیم کے پاس 145 پلس کے بولرز ہیں۔انہوں نے کہا کہ پی ایس ایل 10 کا سیزن بحیثیت ٹیم اور انفرادی کارکردگی اوپر نیچے جا رہا ہے، آغاز میں ہم نے وننگ کمبی نیشن بنانے کی کوشش کی، 2 فتوحات ملیں لیکن ہمیں تسلسل لانا ہو گا۔بابر اعظم کا کہنا ہے کہ لوگوں کا دباؤ ہوتا ہے کہ وہ اتنا پیار کرتے ہیں اور ان کے سامنے پرفارم کرنا ہے، اعتماد بھی ملتا ہے کہ جہاں جاتے ہیں لوگ تعریف کرتے ہیں، میں لوگوں کو تفریح مہیا کرنے کی کوشش کرتا ہوں، جب اسٹیڈیم میں ‘بابر، بابر’ کی ا?وازیں لگتی ہیں تو شکر کرتا ہوں کہ اللّٰہ نے اتنی عزت دی ہے۔انہوں نے کہا کہ سائیکل پر اسٹیڈیم آتے تھے اور سوچتے تھے کبھی یہاں کھیلیں گے، اب اسی اسٹیڈیم میں لوگ ہمارے لیے آواز بلند کرتے ہیں، یہاں بال پکر بننا اور بولر کی حیثیت سے کھیل کا آغاز کرنا سب یاد آتا ہے، میں اللّٰہ کا بڑا شکر ادا کرتا ہوں، میری ذمے داری بڑھ جاتی ہے کہ فینز کو مایوس نہ کروں۔بابر اعظم کا کہنا ہے کہ لوگ میمز بنا کر پیار کرتے ہیں، کبھی کبھار جب میمز سامنے آتی ہیں تو لطف اندوز ہوتا ہوں۔

لاہور(این این آئی)پی ایس ایل 10 میں ملتان سلطانز کے کپتان محمد رضوان کا کہنا ہے کہ ابھی ہم ٹورنامنٹ سے باہر نہیں ہوئے۔لاہور کے قذافی اسٹیڈیم میں کھیلے گئے میچ میں کوئٹہ گلیڈی ایٹرز نے ملتان سلطانز کی جانب سے دیا جانے والا 90 رنز کا ہدف 8ویں اوورز میں بغیر کسی نقصان کے حاصل کرلیا۔کپتان سعود شکیل 40 رنز بنا کر ناٹ آؤٹ رہے، فن ایلن نے 46 رنز کی اننگز کھیلی۔خرم شہزاد کو میچ میں چار کھلاڑیوں کو آؤٹ کرنے پر بہترین کھلاڑی قرار دیا گیا۔تاہم میچ کے بعد گفتگو کرتے ہوئے محمد رضوان نے کہا کہ شاٹ سلیکشن غلط ہوگی تو فلیٹ پچ پر بھی یہی نتیجہ آئے گا، سمجھ داری سے 150 سے زائد رنز بناتے تو کچھ ہوسکتا تھا۔انہوں نے کہا کہ ہمارے پاس اب بھی موقع ہے لیکن دوسروں پر انحصار کرنا بالکل پسند نہیں۔دوسری جانب کوئٹہ گلیڈی ایٹرز کے کپتان سعود شکیل کا کہنا ہے کہ یہ ایک ڈریم میچ تھا اسے ہمیشہ یاد رکھنا چاہوں گا، جیت کا کریڈٹ بولرز کو جاتا ہے، ٹیم تینوں شعبوں میں زبردست پرفارم کررہی ہے۔واضح رہے کہ ملتان سلطانز کی ٹیم سات میچوں میں سے صرف ایک میچ میں کامیابی حاصل کرسکی ہے۔