اسلام آباد(این این آئی)وفاقی وزیر صحت سید مصطفی کمال نے کہا ہے کہ وزیراعظم کی زیر قیادت ملک سے پولیو کے خاتمے کا عزم کررکھا ہے، ملک گیر مہم 26مئی کو شروع کی جائے گی جس کے دوران 4کروڑ 54لاکھ بچوں کو بچاؤ کے قطرے پلانے کا ہدف مقرر کیا گیا ہے۔ترجمان وزارت صحت کے مطابق وفاقی وزیر صحت سید مصطفی کمال سے گیٹس فانڈیشن کے صدر برائے گلوبل ڈیولپمنٹ ڈاکٹر کرس ایلس کی ملاقات ہوئی۔وفاقی وزیر صحت نے پاکستان میں پولیو کے خاتمے کیلئے گیٹس فانڈیشن کی خدمات کو سراہا اور حکومت کی جانب سے پولیو کے خاتمے کے عزم کا ایک بار پھر اعادہ کیا۔انہوں نے گفتگو کرتے ہوئے کہا کہ وفاقی و صوبائی حکومتیں اور قانون نافذ کرنے والے ادارے پولیو کے خاتمے کے لیے یکسو ہیں، پولیو کے خاتمے کی جدوجہد میں قانون نافذ کرنے والے اداروں نے بھی لازوال قربانیاں دی ہیں۔مصطفی کمال نے کہا کہ پولیو کے خاتمے کی جدوجہد میں ہم نے قربانیاں دی ہیں، یہ مشن مکمل ہونے تک جاری رہے گا، وزیراعظم پاکستان کی قیادت میں پولیو کے خاتمے کیلئے پختہ عزم کر رکھا ہے اور وزیراعظم پروگرام کی کارکردگی کا جائزہ لینے کیلئے باقاعدہ اجلاس منعقد کرتے ہیں۔وفاقی وزیر صحت نے کہاکہ پولیو کے خاتمے کی مہم کیلئے مکمل معاونت اور وسائل کی فراہمی یقینی بنائی جا رہی ہے، پاکستان اور افغانستان کے درمیان پولیو کے خاتمے کیلئے قریبی تعاون جاری ہے اور دونوں ممالک میں ایک ساتھ ہی مہم کا انعقاد کیا جارہا ہے۔انہوں نے بتایا کہ پاکستان اور افغانستان میں فروری اور اپریل میں قومی انسداد پولیو مہمات کامیابی سے مکمل کی گئیں جبکہ اگلی ملک گیر انسداد پولیو مہم کا آغاز 26مئی سے کیا جا رہا ہے جس کے دوران 4کروڑ 54لاکھ بچوں کو پولیو سے بچا کے قطرے پلانے کا ہدف مقرر کیا گیا ہے۔وفاقی وزیر صحت نے کہا کہ اعلیٰ معیار کی مہمات اور کمیونٹی کے تعاون کی بدولت حالیہ مہم میں ویکسین سے انکاری والدین میں واضح کمی آئی ہے، رواں سال کے اختتام تک پولیو کے مکمل خاتمے کیلئے پرعزم ہیں۔ترجمان وزارت صحت کے مطابق ڈاکٹر کرس ایلس نے انسداد پولیو اقدامات کو سراہا اور امید ظاہر کی کہ 2025تک پولیو کے خاتمے کیلئے مقرر کردہ ہدف پاکستان حاصل کرلے گا۔

اسلام آباد(این این آئی)نائب وزیر اعظم و وزیر خارجہ اسحق ڈار نے کہا ہے کہ پہلگام واقعے کے پہلے ہی دن سے عالمی برداری میں پاکستان کا پلڑا بھاری تھا مگر پھر بھی ہم نے غیر جانبدارانہ تحقیقات کا مطالبہ کیا،امریکی وزیر خارجہ نے 10مئی کی صبح بھارت کے سیز فائر کا کال پر بتایا،کچھ ممالک نے حملے کا پہلے ہی بتادیا تھا۔اتوارکوایک انٹرویومیں نائب وزیر اعظم اسحق ڈار نے بھارت کا حملے کی پیشگی اطلاع دینے کا دعویٰ مسترد کرتے ہوئے کہاکہ مجھے نہیں پتہ کہ بھارتی وزیر خارجہ جے شنکر نے حملے کی پیشگی اطلاع کسے دی۔وزیر خارجہ نے پاکستان اور بھارت کے درمیان جنگ بندی جاری رہنے کی امید ظاہر کرتے ہوئے کہاکہ بھارت نے دوبارہ کوئی ایڈونچر کیا تو بھرپور جواب دیا جائے گا۔انہوںنے کہاکہ بھارت آج تک پہلگام واقعے کا ثبوت دینے میں ناکام ہے، اس کا سارا بیانیہ جھوٹ پر مبنی ہے۔اسحق ڈار نے کہا کہ حد تو یہ ہے کہ پاکستان نے ایف 16بھارت سے کشیدگی کے دوران اڑایا ہی نہیں اور بھارت نے اسے مار گرانے کا دعویٰ کر دیا۔انہوں نے کہا کہ افواج پاکستان نے دشمن کو بھرپور جواب دیا، بھارت نے جو سفارتی اقدامات کیے ہم نے ان کا بھی جواب دیا ہے۔اسحق ڈار نے کہا کہ پہلگام واقعے کے بعد بھارتی میڈیا نے شور مچایا تھا، ہم نے مختلف ممالک کو آگاہ کیاتھا کہ ہم پہل نہیں کریں گے۔انہوں نے کہا کہ9مئی کی رات کو ہمارے صبر کا پیمانہ لبریز ہوگیا تھا جس کے بعد افواج پاکستان نے دشمن کوبھرپورجواب دیا۔ انہوں نے کہا کہ بھارت نے جھوٹ بولا تھا کہ پاکستان نے 15مقامات پرحملہ کیا۔نائب وزیر اعظم نے کہا کہ ہم نے مختلف ممالک کوبتایا کہ ہم نے ابھی تک حملہ کیا جس پر ایک مغربی ملک نے کہا کہ ہمیں معلوم ہے آپ سچ کہہ رہے ہیں۔وزیر خارجہ نے کہاکہ سیز فائر پرعملدرآمد ہو رہا ہے اور ہم اس پر کاربند ہے تاہم اگر کسی بھی قسم کی جارحیت، شر انگیزی یا سیز فائر کی خلاف ورزی ہوئی تو ہمارا جواب بھرپور ہوگا۔اسحق ڈار نے کہا کہ پہلگام واقعہ ہوا تو کچھ ممالک نے کہا تھا کہ بھارت پنچ لگائے گا جس پر ہم نے واضح کیا تھا کہ اگر بھارت نے کچھ کیا تو ہم اس کاجواب دیں گے۔نائب وزیر اعظم نے کہا کہ پاکستان کا پلڑا پہلے دن سے بھاری ہے، ہم ن یشروع سے کہا تھا کہ پہلگام پرتحقیقات کیلئے تیار ہیں۔ اسحق ڈار نے کہا کہ بھارت کو جواب دینے کا پلان ہم نے پہلے بنا لیا تھا مگر اس پر عمل درآمد نور خان ایئربیس پر حملے کے بعد کیا۔انہوں نے بتایا کہ10مئی کی صبح سوا آٹھ بجے امریکی وزیرخارجہ کا فون آیا اور انہوں نے بتایا کہ بھارت سیزفائر کیلئے تیار ہے۔ اسحق ڈار نے کہا کہ ہم عوام کی بہتری اورمعیشت کیلئے امن چاہتے ہیں اس لیے سیز فائر پر رضامندی ظاہر کی۔

اسلام آباد (این این آئی) رہنماء پی ٹی آئی کنول شوزب نے کہا ہے کہ علیمہ خان سے کوئی اختلاف یا گلہ نہیں، زوم میٹنگ کے ایک مخصوص حصے کی ویڈیو لیک کی گئی۔جاری بیان میں کنول شوزب نے کہا کہ کچھ لوگ علیمہ خان کا نام استعمال کرکے الزام لگا رہے ہیں، اس وقت پوری پارٹی کی توجہ بانی کی رہائی پر ہے۔

نیلم (این این آئی)وفاقی وزیر مملکت برائے بین الصوبائی رابطہ رانا ثناء اللہ بھارتی گولہ باری کے متاثرین کی حوصلہ افزائی اور گولہ باری سے ہونے والے نقصانات کا جائزہ لینے کیلئے نیلم پہنچ گئے۔ جورا، شاہکوٹ اور بگنہ میں بھارتی گولہ باری سے ہونے والے نقصانات کا جائزہ لیا۔ اس موقع پر صدر مسلم لیگ ن آزاد کشمیر شاہ غلام قادر، چیف سیکرٹری آزاد کشمیر خوشحال خان، انسپکٹر جنرل پولیس رانا عبدالجبار بھی ان کے ہمراہ موجود تھے۔ وفاقی وزیر مملکت برائے بین الصوبائی رابطہ رانا ثنائ اللہ کو ڈپٹی کمشنر ندیم احمد جنجوعہ نے بھارتی گولہ باری کے نتیجے میں ہونے والے شہدائ، زخمیوں اور نقصانات کے بارے تفصیلی بریفنگ دی۔وفاقی وزیر مملکت رانا ثناء اللہ بھارتی گولہ باری سے شہید ہونیوالے افراد کے گھر بھی گئے۔ اس موقع پر وفاقی وزیر مملکت نے شہداء کے ایصال ثواب کیلئے فاتحہ خوانی کی اور بلندی درجات کیلئے دعا کی۔ انہوں نے شہداء کے ورثاء سے ملاقات کی اور ان کے ساتھ اظہار ہمدردی بھی کیا۔وفاقی وزیر مملکت نے وزیراعظم پاکستان محمد شہباز شریف کی جانب سے بھارتی گولہ باری کے نتیجے میں شہید ہونے والے 02 افراد کے ورثائ کو 01 کروڑ روپے فی کس امدادی چیک دئے جبکہ بھارتی گولہ باری کے نتیجے میں 02 شدید زخمی افراد کو 20 لاکھ فی کس اور 04 زخمی افراد کو 10 لاکھ فی کس کے چیک دئے۔ اس موقع پر وفاقی وزیر مملکت برائے بین الصوبائی رابطہ رانا ثناء اللہ نے میڈیا سے گفتگو کرتے ہوئے کہا کہ انڈیا کو بلا جواز مسلط کی گئی اپنی ہی جنگ میں ذلت آمیز شکست کا سامنا کرنا پڑا۔ انڈیا نے دوبارہ غلطی کی تو اس سے بڑھ کر جواب ملے گا۔ بھارت نے بلا جواز سویلین آبادی کو ٹارگٹ کر کے بے گناہ شہریوں کو شہید کیا۔لائن آف کنٹرول کے عوام نے بھارتی جارحیت کا ڈٹ کر مقابلہ کیا جس پر ان کو خراج تحسین پیش کرتا ہوں۔ میں آپ کو یقین دلاتا ہوں کہ حکومت پاکستان، افواج پاکستان آپ کے ساتھ کھڑے ہیں اور آپ کو تنہا نہیں چھوڑیں گے۔ پوری قوم کا حوصلہ اور جذبہ شہادت قابل فخر ہے جس قوم میں شہادت پانے کا یہ جذبہ موجود ہو اس کو دنیا کی کوئی طاقت شکست نہیں دے سکتی۔ ہمیں اپنی مسلح افواج اور حکومت پر پورا اعتماد ہے۔پاکستان نے موثر سفارتکاری کے ذریعے مسئلہ کشمیر کو بین الاقوامی سطح پر اجاگر کیاہے۔وزیر مملکت نے شہدائ کے لواحقین کے ساتھ گفتگو کرتے ہوئے کہا کہ وزیر اعظم پاکستان محمد شہباز شریف کی خصوصی ہدایت پر آپ کی حوصلہ افزائی کیلئے آپ کے پاس تشریف لایا ہوں۔دشمن کو دندان شکن جواب دینے پر افواج پاکستان کو خراج عقیدت پیش کرتے ہیں۔لائن آف کنٹرول کے متاثرین کی بحالی کیلئے ہر ممکن اقدامات کریں گے۔

اسلام آباد(این این آئی)وزیر اعظم محمد شہباز شریف نے کہا ہے کہ پاکستان نے صنفی ڈیجیٹل تقسیم کو کم کرنے میں قابل ذکر پیش رفت کی ہے ،جو عالمی سطح پر دیہی خواتین میں ہونے والی سب سے بڑی بہتری ہے ،یہ کامیابیاں پاکستان کی وسیع تر ڈیجیٹل تبدیلی کی عکاس ہیں، پاکستان خواتین کو با اختیار بنانے کیلئے ڈیجیٹل ماحولیاتی نظام کے فروغ کے لیے پرعزم ہے۔ ان خیالات کا اظہار وزیر اعظم محمد شہباز شریف نے ورلڈ ٹیلی کمیونیکیشن اینڈ انفارمیشن سوسائٹی ڈے 2025 کے موقع پر ہفتہ کو اپنے پیغام میں کیا۔ وزیراعظم آفس پریس ونگ کی جانب سے جاری بیان میں وزیر اعظم نے عالمی ٹیلی کمیونیکیشن اینڈ انفارمیشن سوسائٹی ڈے کے موقع پر انٹرنیشنل ٹیلی کمیونیکیشن یونین (ا?ئی ٹی یو ) کی قیادت کو دنیا بھر میں جامع اور مساوی ڈیجیٹل ترقی کو آگے بڑھانے پر پرتپاک مبارکباد پیش کرتے ہوئے کہا کہ رواں سال کا تھیم”ڈیجیٹل تبدیلی کے معاملات میں صنفی مساوات کیوں ضروری؟” فوری ایکشن مانگتا ہے، اس بات کو یقینی بنانے کے لیے کہ تکنیکی ترقی کے فوائد کو معاشرے کے تمام اراکین کو یکساں طور پر ملیں۔ انہوں نے کہا کہ پاکستان نے صنفی ڈیجیٹل تقسیم کو کم کرنے میں قابل ذکر پیش رفت کی ہے۔ 25ـ2024 میں 80 لاکھ مزید خواتین نے موبائل انٹرنیٹ تک رسائی حاصل کی جس سے صنفی فرق 38 فیصد سے کم ہو کر 25 ف?یصد ہوگیا ہے جو عالمی سطح پر دیہی خواتین میں واقع ہونے والی سب سے بڑی بہتری ہے، یہ کامیابیاں پاکستان کی وسیع تر ڈیجیٹل تبدیلی کا حصہ ہیں۔ وزیر اعظم نے کہا کہ پاکستان نے 200 ملین ٹیلی کام سبسکرپشنز، 150 ملین براڈ بینڈ صارفین اور 2 ملین FTTH کنکشنز کو عبور کر لیا ہے جبکہ ڈیٹا کے استعمال میں 24.25 فیصد اضافہ ہوا ہے۔ ہماری موبائل مینوفیکچرنگ میں 47.46 فیصد اضافہ ہوا اور اعلیٰ صلاحیت والی آبدوز کیبلز کے ذریعے بین الاقوامی رابطوں میں اضافہ ہوا،آج پاکستان کا موبائل ایکو سسٹم معیشت میں 16.7 ارب ڈالر کا شراکتدار ہے۔ انہوں نے کہا کہ حکومت پاکستان ایک ایسے ڈیجیٹل ماحولیاتی نظام کو فروغ دینے کے لیے پرعزم ہے جو شمولیت کو فروغ دے، خواتین کو بااختیار بنائے اور کسی کو پیچھے نہ چھوڑے۔ وزیر اعظم محمد شہباز شریف نے کہا کہ ٹارگٹڈ پالیسیوں، مہارتوں کے فروغ کے پروگراموں اور صنفی حساس ڈیجیٹل انفراسٹرکچر کے ذریعے ہم اس بات کو یقینی بنارہے ہیں کہ خواتین اور لڑکیاں ہمارے معاشرے کی ڈیجیٹل تبدیلی میں فعال طور پر حصہ لے سکیں اور اس سے فائدہ اٹھا سکیں۔وزیر اعظم نے ورلڈ ٹیلی کمیونیکیشن اینڈ انفارمیشن سوسائٹی ڈے 2025 پر تمام سٹیک ہولڈرز سے صنفی ڈیجیٹل تبدیلی کے فروغ اور ایک جامع اور بااختیار ڈیجیٹل پاکستان کی تعمیر جاری رکھنے کی اپیل بھی کی۔