سڈنی (این این آئی)پاکستان کرکٹ ٹیم کے فاسٹ بولر عامر جمال نے سڈنی ٹیسٹ کے دوسرے روز آسٹریلوی بیٹر سمیت سب کو حیران کردیا۔میڈیا رپورٹ کے مطابق سڈنی میں جب دوسرے روز ڈرنکس بریک کے بعد کھیل دوبارہ شروع ہوا تو عامر جمال کی ایکٹنگ کو سب سچ سمجھ بیٹھے۔
عامر جمال کی اس دلچسپ ایکٹنگ کو بیٹر، کیپر، فیلڈر، امپائر اور کمنٹیٹرز سمیت ہر کوئی سچ سمجھ بیٹھا۔فاسٹ بولر کے ہاتھ میں گیند موجود نہیں تھی تاہم انہوں نے بالکل اصلی انداز اپناتے ہوئے بولنگ کرانا شروع کی جس کو بیٹر اور کیپر بھی سچ سمجھ گئے اور تیار ہوگئے۔عامر جمال نے بالکل عین وقت پر اپنے ہاتھ کھول کر دکھائے کہ ان کے پاس تو گیند ہی نہیں ہے جس پر کمنٹیٹرز بھی حیران رہ گئے۔
بعدازاں کمنٹیٹرز بھی ری پلے میں دیکھ کر عامر جمال کی ایکٹنگ سے لطف اندوز ہوتے دکھائی دیے۔واضح رہے کہ پاکستان اور آسٹریلیا کے درمیان سڈنی جاری تیسرے ٹیسٹ کے دوسرے روز کا کھیل بارش اور خراب روشنی کی وجہ سے صرف چھیالیس اوورزتک محدود رہا۔کینگروز نے اپنی اننگز میں مہمان ٹیم کے 313 رنز کے جواب میں 2 وکٹوں کے نقصان پر 116 رنز بنالیے ہیں۔
