لاہور( این این آئی)فیڈرل بورڈ آف ریو نیو نے ملک بھر میں ریٹیلرز پر ٹیکس لگانے کی تیاریاںمکمل کر لی ہیں، پہلے مرحلے میں وفاقی دارالحکومت اسلام آباد سمیت پانچ بڑے شہروں میں ریٹیلرز پر ٹیکس لگانے کا فیصلہ کیا گیا ہے جس سے 100ارب روپے آمدن کا تخمینہ ہے ۔ذرائع کے مطابق ایف بی آر نے ملک بھر کے 35لاکھ ریٹیلرز پر ٹیکس لگانے کے لئے اسکیم تیار کی ہے ۔

پہلے مرحلے میں اسلام آباد ، لاہور، پشاور، کراچی اور کوئٹہ کے ریٹیلرز پر ٹیکس لگے گا ، یہ ایڈوانس انکم ٹیکس ہوگاجو ماہانہ بنیادوں پر وصول کیا جائے گا ،جو دکاندار فائلر ہوں گے وہ ریفنڈ لے سکیں گے جبکہ نا ن فائلر کا واپس نہیں ملے گا۔ بتایا گیا ہے کہ ریٹیلرز پر دکانوں کے سائز اور سالانہ آمدن کے تناسب سے ٹیکس لگایا جائے گا۔ذرائع کے مطابق ملک بھر میں ٹیکس عائد ہونے سے 300ارب روپے سے زائد آمدن متوقع ہے ۔ حکومت کی جانب سے گرین سگنل ملنے پر اسکیم لانچ کر دی جائے گی، ریٹیلرزکی سالانہ آمدن پر تقریباً 10 سے فیصد زائد تک ایڈوانس ٹیکس عائد کیا جائے گا جبکہ اسکیم کے تحت تمام شعبوں سے منسلک کاروباروں اور افراد پر ٹیکس عائد کیا جائے گا۔