راولپنڈی (این این آئی)سابق وزیر داخلہ اور سینئر سیاستدان چوہدری نثار علی خان نے بانی تحریک انصاف اور ن لیگی قیادت پر تنقید کرنے سے گریز کیا ہے۔دھمیال میں جلسے سے خطاب میں چوہدری نثار علی خان نے کہا کہ بانی پی ٹی آئی میرے دوست ہیں میں ان پر تنقید نہیں کرنا چاہتا۔انہوں نے کہا کہ مسلم لیگ ن میں 35 سال رہا، ان پر بھی تنقید نہیں کرنا چاہتا، کسی پر تنقید کر کے ووٹ نہیں لینا چاہتا میں اپنے کردار پر ووٹ لینا چاہتا ہوں۔

چوہدری نثار علی خان نے کہا کہ میرے اوپر کرپشن کا کوئی داغ نہیں ہے۔انہوں نے کہاکہ علاقے کا ماضی میں وزیر نہیں بلکہ علاقے کا ویربن کر آیا، میرے مخالفین منتیں کرکے لوگوں کو جلسے میں لاتے ہیں لیکن میں کسی پارٹی کی دْم پکڑ کر نہیں جیتنا چاہتا۔انہوں نے کہا کہ کبھی خود پر داغ نہیں لگنے دیا نہ کرپشن کی، کسی پرتنقید کر کے ووٹ نہیں لینا چاہتا، مسلم لیگ سے میرا تعلق رہا مگر تنقید نہیں کروں گا۔سابق وزیر داخلہ نے کہا کہ پاکستان مشکل ترین دور سے گزر رہا ہے، معجزہ ہی پاکستان کو بچا سکتا ہے، اگر اسمبلی میں گیا تو اس معجزے کا حصہ ہوں گا۔