سرگودھا(این این آئی)پاکستان مسلم لیگ (ن)کے سرگودھا سے سابق رکن قومی اسمبلی اور کنوینر ضلع جھنگ و صوبائی نائب صدر پنجاب چوہدری حامد حمید کی کاوشوں سے ضلع جھنگ کی اہم سیاسی شخصیات وسابق اراکین اسمبلی نے مسلم لیگ (ن)میں شمولیت اختیار کر لی۔
تفصیلات کے مطابق مسلم لیگ ن کے سابق رکن قومی اسمبلی و کنوینر ضلع جھنگ اور نائب صدر پنجاب چوہدری حامد حمید کی کاوشوں سے ضلع جھنگ کی سیاسی شخصیات اور سابق اراکین اسمبلی نے سابق وزیراعظم و پاکستان مسلم لیگ (ن)کے صدر شہباز شریف سے ملاقات کے دوران مسلم لیگ ن میں شمولیت کا اعلان کیا۔
اس طرح مولانا محمد آصف معاویہ،بابر خان سیال، مسز نیلم سیال،مہر اسلم بھروانہ،شیخ ایم یونس، خالد محمود سرگانہ،چوہدری خالد غنی، امیر عباس سیال، فیصل حیات جبوانہ، شیخ یعقوب، مسز شیخ یعقوب، رئیس محمد ابراہیم بھی مسلم لیگ (ن)میں شامل ہوگئے۔جن کا مسلم لیگ (ن)میں شمولیت پرخیر مقدم کیا گیا اور میاں شہباز شریف نے کہا کہ مسلم لیگ (ن)ایک گھر ہے جو پاکستان کی ترقی اور خوشحالی کی ضمانت ہے اس لئے آپ کی شمولیت سے پاکستان کی ترقی کا سفر تیز ہوگا۔
میاں شہباز شریف نے کہا کہ مہنگائی سے عوام کو نجات دلانے کے لئے نواز شریف کے ہاتھ مضبوط کرنے ہیں۔ پاکستان کو معاشی طور پر پیروں پرکھڑا کرنے کی جدوجہد سب مل کر کریں گے۔اس موقع پر شمیولیت اختیار کرنے والے سابق ارکان اسمبلی نے پارٹی قائد محمد نواز شریف اور صدر شہباز شریف پر اپنے مکمل اعتماد کا اظہار کیا۔
