کراچی (این این آئی)معروف کامیڈین، گلوکار، اداکار و میزبان علی گل پیر نے ویڈیو کے ذریعے بھارتی کرکٹ ٹیم کے سابق فاسٹ بولر عرفان پٹھان کو جواب دے دیا۔آئی سی سی کرکٹ ورلڈ کپ 2023کے میچز کے بعد سابق بھارتی بولر عرفان پٹھان کی جانب سے ڈانس کی کئی ویڈیوز سامنے آئی تھیں۔ایسی ہی ایک ویڈیو میں عرفان پٹھان نے پاکستان کے خلاف افغانستان کی جیت پر ڈانس کیا تھا۔

گزشتہ روز ورلڈ کپ کے فائنل میں آسٹریلیا کے خلاف بھارت کی شکست کے بعد عرفان پٹھان کو مسلسل ٹرول کیا جارہا ہے، ایسے میں پاکستانی کامیڈین علی گل پیر نے بھی انہیں ٹرول کرتے ہوئے جواب دے دیا۔ سوشل میڈیا اکائونٹ پر علی گل پیر نے ڈانس کرتے ہوئے اپنی ویڈیو شیئر کی جس میں انہوں نے کہا کہ یہ ویڈیو عرفان پٹھان کیلئے ہے۔سوشل میڈیا پر علی گل پیر کی ویڈیو کو خوب پسند کیا جارہا ہے، جبکہ صارفین کی جانب سے دلچسپ تبصروں کا سلسلہ بھی جاری ہے۔