کراچی(این این آئی)نگران وفاقی وزیر مذہبی امور انیق احمد نے کہاہے کہ تاریخ میں پہلی بار حج سستا کیا جارہا ہے،عازمین حج کو موبائل سم اور کیوآر کوڈ والا سوٹ کیس بھی دیا جائیگا،عازمین حج کیلئے پروازوں کے کرایوں میں کمی کے بارے میں فضائی کمپنیوں کے ساتھ مذاکرات جاری ہیں، پاکستان میں کبھی ایسا نہیں ہوا کہ آنے والا حج پچھلے حج سے سستا ہو۔

کراچی میں بزنس فورم کے عشائیے سے خطاب کرتے ہوئے نگران وزیر برائے مذہبی امور نے کہا کہ 90 ہزار حجاج کو مفت انٹرنیٹ پیکیج کے ساتھ موبائل سم دیں گے، حجاج کو کیو آر کوڈ کے ساتھ سوٹ کیس بھی دیا جائے گا۔انہوں نے کہا کہ روڈ ٹو مکہ پروگرام کے کراچی سے جانے والے حجاج کا امیگریشن بھی کراچی میں ہی ہوگا، امید ہے 9 مئی سے پہلے لاہور کو بھی روڈ ٹو مکہ پروگرام میں شامل کر لیا جائے گا۔

نگران وفاقی وزیر نے کہا کہ حج درخواستوں اور انتظامات کے عمل کو جدید خطوط پر استوار کرنے کیلئے ایک ایپ متعارف کرائی گئی ہے، حکومت خواتین عازمین حج کیلئے عبایہ فراہم کرے گی جس پر پاکستانی جھنڈا بنا ہوگا، جس سے ان کی شناخت آسان ہوجائے گی۔نگران وزیر مذہبی امور انیق احمد نے کہا ہے کہ اسلام میں غیر مسلموں سے تجارت منع نہیں، پاکستان میں سب سے زیادہ ٹیکس ملٹی نیشنل کمپنیاں دیتی ہیں، جذبات میں ہمیشہ حکمت کو غالب رکھنا چاہئے، حکیمانہ انداز ہونا چاہئے، خیال رہنا چاہئے کہ جذبات میں ملک اور ریاست کو نقصان نہ پہنچے۔