لاہور ( این این آئی) سابق وزیر اطلاعات محمد علی درانی نے قومی حکومت کا نیا فارمولا پیش کر تے ہوئے کہا ہے کہ میرا اگلا فارمولا منتخب نیشنل یونٹی گورنمنٹ کا ہے، اس میں تمام سیاسی جماعتیں ہوں گی۔

انہوں نے نجی ٹی وی کو انٹرویو دیتے ہوئے کہا کہ بہترین نیشنل حکومت وہی ہے جسے عوام منتخب کرے، نیشنل حکومت کا پہلا پوائنٹ یہ ہوگا کہ اس میں تمام سیاسی جماعتیں ہوں گی، دوسرا ان جماعتوں میں سب سے زیادہ نشستوں والی جماعت وزیر اعظم کے لیے 3نام دے، ان میں سے جس کو اسمبلی منتخب کرے وہ وزیر اعظم بنے۔

سابق وزیر نے کہا کہ منتخب نیشنل یونٹی گورنمنٹ کا تیسرا نکتہ یہ ہے کہ کابینہ میں 30سے زیادہ وزراء نہیں ہونے چاہئیں، چوتھا پوائنٹ یہ ہے کہ 6ماہ میں بلدیاتی انتخابات ہوں جن کی مدت اسمبلیوں کے برابر ہو، یہ بھی طے ہو کہ آئندہ قومی و صوبائی انتخابات کے ساتھ بلدیاتی انتخابات بھی ہوں۔

محمد علی درانی کے مطابق اس وقت ہماری جمہوریت چند الیکٹیبلز کے گرد گھوم رہی ہے، ہم نے نظام کو پاکستان، عوام اور ان کے اداروں کے مفاد میں لانا ہے۔انہوں نے کہا کہ انتخابات سے پہلے سیاسی جماعتیں تحریری معاہدے پر دستخط کریں اور اس معاہدے میں اقرار کریں کہ الیکشن کے بعد ہم سب مل کر حکومت بنائیں گے، نواز شریف آئے تو 70فی صد لوگوں نے ان کی مفاہمت کی بات کو پسند کیا، مفاہمت پر مائنس پی ٹی آئی کا ابھی تک کوئی آئینی اور قانونی ثبوت نہیں ہے۔