لاہور ( این این آئی) نگران وزیراعظم انوارالحق کاکڑ نے غزہ پر اسرائیل کی عام شہریوں کو نشانہ بنانے کی بھرپور مذمت کرتے ہوئے کہا ہے کہ دنیا فلسطینی عوام کے قتل عام کو بند کرانے کیلئے عملی اقدامات کرے ۔انوار الحق کاکڑ نے سوشل میڈیا پلیٹ فارم ایکس پر جاری بیان میں کہا کہ پناہ گزینوں کے جبالیہ کیمپ پر شدید بمباری کی گئی ہے، اسرائیل کی بمباری سے سینکڑوں شہری شہید ہوئے جن میں خواتین اور بچے بھی شامل ہیں۔
نگران وزیر اعظم نے کہا کہ اس طرح کی قابل مذمت کارروائیوں کو کبھی معاف یا فراموش نہیں کیا جاسکتا،فلسطینی عوام کے قتل عام کو بند کرانے کے لیے دنیا کو اب عملی اقدامات کرنے چاہئیں۔واضح رہے کہ اسرائیلی فورسز کی جانب سے منگل کے روز غزہ میں جبالیہ پناہ گزین کیمپ پر فضائی حملے میں مزید 100سے زائد فلسطینی شہید جبکہ 150کے قریب زخمی ہو گئے ہیں۔ اسرائیل کی وحشیانہ بمباری کے نتیجے میں اب تک 9ہزار سے زائد فلسطینی شہید ہوچکے ہیں۔
