چنئی (این این آئی)پاکستان کرکٹ ٹیم کے کپتان بابر اعظم نے کھلاڑیوں کا مورال بلند کرنے کے لیے لیکچر دیتے ہوئے کہاہے کہ ہم ایسا کئی بار کر چکے ہیں کہ نیچے سے اوپر اٹھتے ہیں۔کھلاڑیوں کا جوش بڑھانے کے لیے یہ لیکچر بابر اعظم نے چنئی کے چدم برم اسٹیڈیم میں پریکٹس کے دوران دیا۔اس موقع پر پاکستان ٹیم کے کپتان بابر اعظم نے کہا کہ پہلی بار نہیں ہوا، ایسا پہلے بھی ہوچکا ہے اور اس وقت بھی پاکستان ٹیم نیچے سے اوپر آئی۔
بابر اعظم نے کہا کہ جب ہم نیچے سے اٹھتے ہیں تو سیدھا ٹاپ پر جاتے ہیں، جب ایک دوسرے کے ساتھ رہیں گے تو آسانی ہو گی، ہمیں ایک دوسرے سے کندھے سے کندھا ملا کر چلنا ہے۔انہوں نے کہا کہ اب بھی ہم دوبارہ اٹھ سکتے ہیں، یہ بات اس وجہ سے بار بار دہرا رہا ہوں کے ماضی میں کئی بار ہم ایسی پوزیشن سے نکلے اور اب بھی نکل سکتے ہیں۔واضح رہے کہ پاکستان کرکٹ ٹیم ورلڈ کپ میں جمعہ کو اپنا چھٹا میچ جنوبی افریقا کے خلاف کھیلے گی۔قومی ٹیم نے اب تک 5 میچز میں سے 2 جیتے ہیں، پاکستان ٹیم کو بھارت، آسٹریلیا اور افغانستان نے شکست دی ہے۔
