اسلام آباد (این این آئی)نگراں وزیر داخلہ سرفراز بگٹی نے کہاہے کہ غیر قانونی مقیم غیر ملکی 50 ہزار روپے سے زائد کی نقدی ساتھ نہیں لے جا سکتے۔ایک بیان میں سرفراز بگٹی نے کہا کہ یکم نومبر کے بعد غیرقانونی مقیم غیرملکیوں پر سمجھوتہ نہیں کریں گے، غیر قانونی تارکین وطن سے متعلق پلان کو حتمی شکل دے دی، مختلف شہروں میں سینٹرز بنائے گئے ہیں جہاں ان تارکینِ وطن کو رکھا جائے گا۔

انہوں نے کہا کہ کوئی بھی غیر قانونی مقیم افراد کو پناہ دے گا تو اس سے سختی سے نمٹیں گے، غیر قانونی غیر ملکیوں کی جیو فینسنگ کر لی ہے، ہمارے پاس مکمل معلومات ہیں۔سرفراز بگٹی نے کہا کہ ہمیں علم ہے کہ غیر قانونی تارکینِ وطن کس گاں اور کس شہر میں ہیں، رضاکارانہ طور پر واپس جانے والے تارکینِ وطن کی حوصلہ افزائی کریں گے۔

نگراں وزیرِ داخلہ نے کہا کہ مہم غیر قانونی مہاجرین سے متعلق ہے قانونی دائرے میں آنے والوں کا مسئلہ نہیں، ویزا لے کر پاکستان آئیں ہم مہمان نوازی کریں گے، ہم مہمان نواز ہیں۔انہوںنے کہاکہ سیاسی قیادت کو تھریٹس موجود ہیں، وہ وقت آئے گا کہ اس ملک میں ایک بھی غیر قانونی غیر ملکی نہیں ہو گا، ناممکن ہے کہ کوئی ڈالر یہاں سے اسمگلنگ کر کے لے جائے۔