کراچی(این این آئی)قومی ایئر لائن کی مزید 18 ملکی و غیر ملکی پروازیں منسوخ کر دی گئی ہیں جن میں کراچی آنے اور جانے والی 14 پروازیں بھی شامل ہیں جبکہ بیشتر پروازوں کی آمد اور روانگی میں غیر معمولی تاخیر کی گئی ہے۔کراچی سے لاہور، بہاول پور، رحیم یار خان اور کوئٹہ کی 4 پروازیں اور کراچی سے اسلام آباد کے لیے پی کے 308 اور پی کے 368 منسوخ کر دی گئیں۔
اسلام آباد سے کراچی کی پرواز پی کے 319 اور پی کے 369 سمیت دمام، مسقط، لاہور، بہاولپور، رحیم یار خان اور کوئٹہ سے کراچی آنے والی 7 پروازیں بھی منسوخ کر دی گئیں۔ اسلام آباد سے سکھر اور کوئٹہ آنے جانے والی 4 پروازیں بھی منسوخ کر دی گئیں۔ کراچی سے مدینہ کی پرواز پی کے 743 کی روانگی میں 6 گھنٹہ 20 منٹ، اسلام آباد سے جدہ کے لیے دن 11 بجے کی پرواز پی کے 735 میں 14 گھنٹے کی تاخیرسے روانہ ہوئی۔ملتان سے مدینہ کی پرواز 4 گھنٹے 25 منٹ کی تاخیر سے دوپہر 12 بجے روانہ ہوئی۔
