ممبئی(این این آئی)بالی ووڈ کے شہنشاہ امیتابھ بچن کو حال ہی میں ایک خوش فہمی ہوئی جسے پاکستانی فنکاروں نے بڑے ادب سے دور کردیا۔ایک بچے کی کرکٹ کھیلتے ہوئے ویڈیو سوشل میڈیا پر اس قدر وائرل ہورہی ہے کہ پڑوسی ملک کے سٹار اداکار امیتابھ بچن بھی اس بچے کی تعریف میں کچھ جملے کہہ گئے۔
انسٹا گرام پر بچے کی ویڈیو شیئر کرتے ہوئے امیتابھ بچن نے لکھاکہ بھارتی کرکٹ کا مستقبل محفوظ ہاتھوں میں ہے،بالی ووڈ شہنشاہ کی خوش فہمی کو دور کرنے کیلئے پاکستانی فنکار آگے بڑھے۔ویڈیو کے کمنٹس میں تبصرہ کرتے ہوئے پاکستانی گلوکار گوہر ممتاز لکھتے ہیں کہ جناب یہ بچہ پاکستان سے ہے،کچھ دن قبل اس کی یہ ویڈیو اس کی اپنی آئی ڈی سے ایک پاکستانی پیج پر شیئر کی گئی تھی لیکن اگر ہم ایک دوسرے کے ملک میں کھیلنے کے لیے راضی ہوں تو کرکٹ کا مستقبل ہمارے ہاتھ میں ہے، آپ کا سب سے بڑا مداح۔
چند لمحوں بعد گلوکار عاصم اظہر نے بھی گلوکار گوہر ممتاز کی تائید کرتے ہوئے کہاکہ محترم پاکستان سے آپ کا سب سے بڑا مداح، جیسا کہ میرے دوست گوہر نے بتایاکہ یہ بچہ پاکستانی ہے لیکن آپ یقینی طور پر درست ہیں کہ دونوں فریقین کا مستقبل محفوظ ہاتھوں میں ہے،اگر ہم جلد ہی پرانے دنوں کو واپس لے آئیں، جب دونوں طرف کے کھلاڑی ایک دوسرے کے ساتھ ایک دوسرے کے ملکوں میں کھیلا کرتے تھے۔امیتابھ بچن کی اس ویڈیو پر دیگر فنکاروں نے بھی کمنٹس کئے ہیں اور اس بچے کی تعریف کی ہیں۔
