اسلام آباد (این این آئی)اربوں روپے مالیت کے کرپشن ریفرنسز دوبارہ کھولنے کے بعد چیئرمین نیب نے کرپشن کے خلاف کارروائیوں کیلئے حساس اداروں کے افسران کی خدمات لینے کا فیصلہ کرلیا۔ ذرائع کے مطابق میگا کرپشن کیسز کے بعد احتسابی ادارے کی جانب سے حساس اداروں کے افسران کی خدمات لی جائینگی۔
نیب حکام کے مطابق احتسابی ادارے نے اہم عہدوں پر تقرریوں کے لیے ڈیپوٹیشن پر حساس اداروں سے افسران مانگ لیے ہیں،حساس اداروں کے افسران آئندہ چند روز میں نیب میں کام شروع کردیں گے۔ اسی ضمن میں چیئرمین نیب لیفٹیننٹ جنرل ریٹائرڈ نذیر احمد کی منظوری سے حساس اداروں کے افسران کی خدمات کے لیے خط بھی لکھ دیاگیا ہے۔ حکام نے بتایا کہ نیب میں تمام خالی آسامیوں پر بھی فوری طور پر تقرریاں کردی جائیں گی،ڈپٹی چیئرمین نیب اور پراسیکیوٹر جنرل کے عہدوں پر بھی مستقل افسران کا تقرر کردیا جائے گا۔
