اسلام آباد (این این آئی) حکومت نے آئی ایم ایف کالگژری امپورٹس پر اضافی ٹیکس کا مطالبہ مسترد کردیا ہے ۔نجی ٹی وی کے مطابق وفاقی حکومت نے طے شدہ ٹیکس اہداف پورے کرنے کے لئے لگژری درآمدات پر ٹیکس بڑھانے کا آئی ایم ایف کا مطالبہ مسترد کردیا ہے۔ذرائع کے مطابق آئی ایم ایف نے آرڈیننس کے ذریعے ٹیکس بڑھانے کی تجویز دی تھی۔
تاہم حکام نے کہا ہے کہ ایف بی آر نے گزشتہ دو ماہ میں ٹیکس کی مد میں 24ارب روپے اکٹھے کئے ہیں، اس حساب سے پہلی سہ ماہی کا 30ارب کا ہدف آسانی سے حاصل ہو جانا چاہئے۔حکومتی ذرائع نے دعویٰ کیا کہ آئی ایم ایف نے حکومت کی محصولات کی وصولی کی کارکردگی پر اطمینان کا اظہار کیا ہے۔نجی ٹی وی کے مطابق لگژری آئٹمز پر ٹیکس بڑھانے سے حاصل ہونیوالی آمدنی زیادہ ہوگی،
لیکن اتنی زیادہ بھی نہیں کہ آئی ایم ایف کے 200ارب روپے سے زائد کے ٹیکس اہداف میں کوئی خاطر خواہ حصہ ڈال سکے۔ذرائع کے مطابق اس معاملے پر حکومت اور آئی ایم ایف کی ٹیم کے درمیان بات چیت ہوئی تھی لیکن صرف رسمی ،دونوں فریق سمجھتے ہیں کہ اس طرح کے اقدامات درآمدات کو مکمل طور پر روک دیں گے۔ ذرائع کے مطابق دونوں فریقین یہ بھی سمجھتے ہیں کہ عوام پر پہلے ہی بہت زیادہ ٹیکس عائد کیا جا چکا ہے۔
