اسلام آباد(این این آئی)نگراں وزیراعظم انوار الحق کاکڑ نے کہا ہے کہ معیشت کی بحالی کیلئے حکومت اقدامات کررہی ہے، جلد بہتری نظرآناشروع ہوجائے گی۔نجی ٹی وی کے مطابق نگراں وزیراعظم انوارالحق کاکڑ نے کہا کہ گورننس کے معاملات کوبہترکرنے کیلئے کوشاں ہیں، معاشی بحالی کیلئے اقدامات کررہے ہیں، حکومتی اقدامات سے جلد بہتری نظر آنا شروع ہوجائے گی۔انہوں نے کہا کہ ایس آئی ایف سی کے تحت معیشت کی بحالی اور زرعی شعبے کے لیے اہم اقدامات کیے گئے ہیں،سرحدی علاقوں میں اسمگلنگ کی روک تھام کیلئے گہری نظررکھے ہوئے ہیں۔
سرمایہ کاری کے موضوع پر نگراں وزیراعظم نے کہا کہ خلیجی ممالک معدنیات کے شعبے میں سرمایہ کاری کے خواہشمند ہیں اور سرمایہ کاری کیحوالیسے سعودی ولی عہد اورآرمی چیف کے درمیان مثبت بات چیت ہوئی ہے۔انوارالحق کاکڑ نے کہا کہ پاکستان خطے کے ممالک کے ساتھ معاشی تعلقات میں بہتری لارہا ہے۔ انہوںنے کہاکہ حکومت اپنے اخراجات پرمکمل نظر رکھے ہوئے ہے اور پنشن فنڈز کے مسائل کو بھی دیکھ رہے ہیں۔نگراں وزیراعظم نے اپنے بیان میں کہا کہ ہم مقبول کی بجائے ملک کیلئے درست فیصلوں پریقین رکھتے ہیں۔ انہوں نے کہا کہ انتخابات کیلئے فیصلہ الیکشن کمیشن نے کرناہے۔
