لاہور (این این آئی)سابق پاکستانی کرکٹر ثقلین مشتاق اپنے داماد شاداب خان کی تعریف کئے بغیر نہ رہ سکے ۔ سوشل میڈیا پر ثقلین مشتاق نے شاداب خان کی تصویر شیئر کرتے ہوئے انہیں بہترین فیلڈر قرار دیا۔اس سے قبل افغانستان کے خلاف پہلے ون ڈے میچ میں شاندار کیچ پکڑنے کے بعد شاداب خان نے ٹوئٹر(ایکس)پر کیچ کی ویڈیو پوسٹ کرتے ہوئے بظاہر کپتان بابر اعظم کے نام پیغام جاری کرتے ہوئے لکھا تھا کہ بڈھا نہیں ہوا ابھی میں۔
شاداب خان کی اس ٹوئٹ پر پاکستان ویمن کرکٹ ٹیم کی بولر فاطمہ ثنا نے بھی جواب دیا تھا۔شاداب خان کی ٹوئٹ پر اظہارِ خیال کرتے ہوئے فاطمہ ثنا نے لکھا تھا کہ شیر کبھی بڈھا نہیں ہوتا شیڈی بھائی۔یاد رہے کہ منگل کو پاکستان اور افغانستان کے درمیان ہونے والے پہلے ایک روزہ میچ میں قومی ٹیم نے افغانستان کو 142 رنز سے شکست دی تھی۔
