لاہور(این این ا ٓئی)استحکام پاکستان پارٹی (آئی پی پی)نے پی ٹی آئی اور پی ڈی ایم کی ناکامیاں سامنے لانے کا فیصلہ کر لیا۔تفصیلات کے مطابق لاہور کے مقامی ہوٹل میں استحکام پاکستان پارٹی کی بڑی بیٹھک ہوئی جبکہ پارٹی رہنمائوں کو عشائیہ بھی دیا گیا،
پیٹرن انچیف جہانگیر ترین اور صدر عبدالعلیم خان کے علاوہ ترجمان ڈاکٹر فردوس عاشق اعوان ، عمران اسماعیل، سردار تنویر الیاس اسحاق خاکوانی، محمود مولوی، غازی غلاب جمال، عون چوہدری نعمان لنگڑیال، فیاض الحسن چوہان، نوریز شکور، شعیب صدیقی، میاں خالد محمود، چوہدری ظہیر اور سعید نوانی نے شرکت کی۔
اس موقع پر سابق صوبائی وزیر کرنل ریٹائرڈ ہاشم ڈوگر نے استحکام پاکستان پارٹی میں شمولیت کا با ضابطہ اعلان بھی کیا۔جہانگیر ترین اور عبدالعلیم خان نے پارٹی قائدین سے مشاورت کی جس میں بنیادی پارٹی پالیسی پر اتفاق رائے ہوا اور مشاورت میں فیصلہ کیا گیا کہ پی ٹی آئی اور پی ڈی ایم کی ناکامیاں سامنے لائیں گے۔
اس موقع پر جہانگیر ترین اورعبدالعلیم خان نے پارٹی کے نامزد ڈویژنل صدور اور دیگرعہدیداران کو مبارکباد بھی پیش کی۔پارٹی قائدین کی جانب سے فیصلہ کیا گیاکہ توانائی اور پیٹرولیم مصنوعات کی قیمتوں کو فوکس کیا جائے جبکہ بجلی کے بلوں کا ایشو بھی اٹھایا جائے۔پیٹرن انچیف نے پارٹی رہنمائوں کو ہدایت جاری کی کہ عام انتخابات کیلئے سخت محنت کریں۔
جہانگیر ترین نے عشائیے میں شریک رہنمائوں سے خطاب کرتے ہوئے کہاکہ ملک و قوم کے مفاد میں خود کو پیچھے اور پارٹی کو آگے رکھیں گے، جہاں کسی کو ضرورت ہو گی پارٹی مکمل مدد فراہم کرے گی، نیا پاکستان بنانا خواب تھا اس خواب کو ضرور پورا کریں گے۔صدر استحکام پاکستان پارٹی عبدالعلیم خان نے کسی سیاسی جماعت سے الحاق خارج ازامکان قرار دیتے ہوئے کہاکہ پارٹی ہر حلقے سے خود الیکشن میں حصہ لے گی،
دونوں حکومتیں آج ہونے والی تباہی و بربادی کی برابر کی ذمہ دار ہیں۔عبدالعلیم خان نے کہاکہ صارفین کو تین سو یونٹ اور چھوٹے کسانوں کو ٹیوب ویل کی بجلی مفت دیں گے،کسی اور کو اہل کرانے کے لئے جہانگیر ترین نے خود کو نااہل کرا کر قربانی دی، عمران خان کی بدنصیبی تھی اس نے جہانگیر ترین کی صلاحیتوں سے فائدہ نہیں اٹھایا جس جس نے نیکی کی چیئرمین پی ٹی آئی نے اس کو ضرور ڈسا،اب مکافات عمل ہورہا ہے۔
