اسلام آباد (این این آئی)محکمہ موسمیات نے 14اگست کو ملک کے بیشتر علاقوں میں بارشوں کی پیشگوئی کردی، جبکہ ملک کے بالائی علاقوں میں وقفے وقفے سے مون سون بارشوں کا سلسلہ جاری رہنے کا امکان ہے، نشیبی علاقے زیر آب آنے ،پہاڑی علاقوں میں لینڈ سلائیڈنگ کا خدشہ بھی ظاہر کیا گیا ہے۔

محکمہ موسمیات کے مطابق بحریہ عرب سے مون سون ہوائیں ملک کے بالائی علاقوں میں داخل ہورہی ہیں جس کے باعث ملک کے بیشتر اضلاع میں بارشوں کا امکان ہے۔محکمہ موسمیات کے مطابق 13سے 16اگست کے دوران کشمیر، گلگت، مری، اسلام آباد، راولپنڈی میں شدید بارشوں کا امکان ہے۔

محکمہ موسمیات نے بتایا کہ 15اور 16اگست کو ڈیرہ غازی خان، راجن پور، موسی خیل، بارکھان، ژوب اور قلات میں تیز ہواں اور بارش کی توقع ہے۔محکمہ موسمیات نے موسلا دھار بارش کے باعث راولپنڈی، اسلام آباد، پشاور، گوجرانولہ، لاہور کے نشیبی علاقے زیر آب آنے اور پہاڑی علاقوں میں لینڈ سلائیڈنگ کا خدشہ ظاہر کرتے ہوئے تمام متعلقہ اداروں کو الرٹ رہنے کی ہدایت کردی ہے۔