ممبئی(این این آئی)بھارتی کرکٹ ٹیم کے وکٹ کیپر بیٹر دنیش کارتک بھی پاکستان کے اسپیڈ اسٹار حارث رئوف کی بولنگ کے مداح نکلے۔ بھارتی میڈیا کے مطابق دنیش کارتک نے کہاکہ واضح طور پر حارث رف وائٹ بال کرکٹ میں اس وقت دنیا کے بہترین بولرز میں سے ایک ہیں،کچھ سال پہلے تک حارث ٹینس بال کے ساتھ کرکٹ کھیلتے تھے۔
انہوں نے کہاکہ حارث نے لاہور قلندرز کے ساتھ سفر شروع کیا،لیگ کرکٹ کھیلی اور پھر پاکستان ٹیم میں شاندار پرفارمنس دکھائی، حارث رئوف ڈیتھ اوورز کے بہترین بولر ہیں۔واضح رہے کہ حارث رئوف ان دنوں انگلینڈ میں دی ہنڈرڈ لیگ میں ویلش فائر کی نمائندگی کر رہے ہیں،گزشتہ روز دی ہنڈرڈ میں کھیلے گئے میچ میں حارث رف نے 3وکٹیں اپنے نام کیں۔اس کے علاوہ دی ہنڈرڈ لیگ میں حارث رف کے ساتھ شاہین آفریدی بھی ان ایکشن ہیں۔
