اسلام آباد(این این آئی)وفاقی حکومت نے پیٹرول کی قیمت میں 12روپے کم کرنے کا اعلان کردیاہے اورہائی اسپیڈ ڈیزل کی قیمت میں 30روپے اورمٹی کے تیل میں 12روپے فی لیٹر کمی کردی ہے۔وزیرخزانہ اسحاق ڈار نے پیٹرولیم مصنوعات کی قیمتوں میں ردبدل کااعلان کرتے ہوئے کہاکہ پیٹرول کی قیمت میں 12روپے فی لیٹرکمی کی گئی ہے، ہائی اسپیڈ ڈیزل کی قیمت میں 30روپے اورمٹی کے تیل میں 12روپے فی لیٹر کمی کی گئی ہے۔
اسحق ڈار نے کہاکہ وزیراعظم شہباز شریف اور ان کی حکومت کی ہر مہینے بھرپور کوشش ہوتی ہے کہ عوام کے لیے زیادہ سے زیادہ ریلیف بین الاقوامی مارکیٹ کی بنیاد پر پاس کی جائے۔انہوں نے کہا کہ رات12بجے کے بعد پیٹرول کی قیمت میں فی لیٹر12روپے کمی کے بعد 282روپے سے کم ہو کرنئی قیمت 270روپے ہوگئی ہے،ہائی اسپیڈ ڈیزل کی قیمت میں 30روپے فی لیٹر کمی کے بعد288روپے سے کم ہو کر نئی قیمت258روپے اورمٹی کے تیل میں 12روپے فی لیٹر کمی کے بعد176روپے 7پیسے سے کم ہو کر نئی قیمت164روپے 7پیسے ہوگئی ہے۔
انہوں نے کہاکہ لائٹ ڈیزل آئل کی فی لیٹر قیمت164روپے 68پیسے سے کم ہو کر152روپے 68پیسے مقررکردی ہے۔انہوں نے کہا کہ 16مئی سے31مئی تک کیلئے پیٹرولیم مصنوعات کی قیمت میں کمی کی گی ہے۔اسحق ڈار نے کہا کہ ٹرانسپورٹرز اور ڈیزل کے استعمال والے مختلف محکموں اور اداروں سے گزارش ہے کہ وہ کرایوں اور دیگر مد میں عوام کو ریلیف دیں تاکہ عوام کو بھی نہ صرف براہ راست قیمتوں میں فرق ہو۔انہوں نے کہاکہ جب قیمتیں بڑھتی ہیں تو اس کی وجہ سے ٹرانسپورٹرز کرایہ بڑھا دیتے ہیں، سبزیاں اور دیگر کھانے پینے کی اشیا کی قیمتوں میں اضافہ کیا جاتا ہے، اس لیے پاکستان کے عوام کے لیے کرایوں اور باقی معاملات میں کمی کا اعلان کریں۔
