اسلام آباد(این این آئی)وزیر اعظم شہباز شریف نے کہا ہے کہ اگر ن لیگ الیکشن جیتی تو وزارت عظمیٰ کے امیدوار نواز شریف ہوں گے،9 مئی کے واقعات پاکستان، افواج پاکستان اور سپہ سالار کے خلاف سازش تھے،مدت ختم ہونے سے پہلے اسمبلیاں تحلیل کرنے کی سمری صدر کو بھیج دیں گے۔
ایک انٹرویومیں وزیراعظم شہباز شریف نے کہاکہ9 مئی کی سازش کا سرغنہ چیئرمین پاکستان تحریک انصاف (پی ٹی آئی) تھے۔شہباز شریف نے کہاکہ9 مئی کی سازش میں خواتین، مرد، سیاسی جتھہ، کچھ فوجی اور ان کے خاندان شامل تھے، 9 مئی کی سازش کرنے والوں کی کوشش تھی کہ فوج کا تختہ الٹ دیں، 9 مئی کی سازش کرنے والے پاکستان میں انارکی اور خانہ جنگی چاہتے تھے۔موجودہ حکومت کی مدت ختم ہونے سے متعلق سوال پر شہباز شریف نے کہا کہ قومی اسمبلی کی مدت 12 اگست کی رات 12 بجے تک ہے،
مدت ختم ہونے سے پہلے اسمبلیاں تحلیل کرنے کی سمری صدر کو بھیج دیں گے۔صدر مسلم لیگ (ن ) نے کہاکہ الیکشن میں پیپلز پارٹی اور جے یو آئی سمیت اتحادی جماعتوں کے ساتھ سیٹ ایڈجسٹمنٹ ہو سکتی ہے، جہاں سیٹ ایڈجسٹمنٹ کی ضرورت نہیں وہاں مسلم لیگ ن اپنا امیدوار کھڑا کرے گے۔الیکشن جیتنے کی صورت میں مسلم لیگ ن کے وزارت عظمیٰ کے امیدوار سے متعلق سوال پر شہباز شریف نے کہاکہ اگر ن لیگ الیکشن جیتی تو وزارت عظمیٰ کے امیدوار نواز شریف ہوں گے۔
