گوجرانوالا(این این آئی)گوجرانوالا کی انسداد دہشت گردی عدالت نے وفاقی وزیر داخلہ رانا ثناء اللہ کو دہشت گردی کے مقدمے سے بری کردیا۔انسداد دہشت گردی عدالت میں وفاقی وزیر داخلہ رانا ثناء اللہ کے خلاف گجرات کے تھانہ انڈسٹریل میں درج مقدمے کی سماعت ہوئی۔
رانا ثناء اللہ انسداد دہشت گردی عدالت گوجرانوالا میں پیش ہوئے،عدالت نے بذریعہ نوٹس رانا ثناء اللہ کو منگل کوطلب کیا تھا۔دوران سماعت مدعی مقدمہ اپنا بیان تبدیل کرلیا جس پر عدالت نے رانا ثناء اللہ کو مقدمے سے بری کر دیا۔واضح رہے کہ رانا ثناء اللہ کے خلاف25اگست 2022کو شاہ کاز اسلم نامی شہری کی مدعیت میں انسداد دہشت گردی کی دفعات کے تحت مقدمہ درج کیاگیا تھا جس میں ان پر چیف سیکرٹری اور ان کے اہلخانہ کوجان سے مارنے کی دھمکیاں دینے کا الزام عائد کیا گیا تھا۔
عدالت کے باہر میڈیا سے گفتگوکرتے ہوئے رانا ثناء اللہ نے کہاکہ مجھ سمیت ہمارے تمام قائدین عدالتوں میں پیش ہوئے،یہاں آنے سے قبل کسی کو اطلاع نہیں کی،ہم نے عدالتوں کے دروازے توڑے نہ ججز کو کام سے روکا،ہم ایک عام آدمی کی حیثیت سے پیش ہوئے اور قانون کا سامنا کیا۔رانا ثناء اللہ نے کہاکہ ہم نے سروں پر بالٹیاں نہیں رکھیں،نہ اس طرح کے ڈرامے کئے،9مئی کے واقعات میں ملوث افراد کو انجام تک پہنچایا جائیگا۔
