لاہور/اسلام آباد ( این این آئی) وزیر اعظم شہباز شریف نے نگران سیٹ اپ پر مشاورت کے لئے مذاکراتی کمیٹی تشکیل دیدی۔ذرائع کے مطابق (ن) لیگ نے نگران سیٹ اپ کی مشاورت کے لئے پانچ رکنی مذاکراتی کمیٹی تشکیل دی ہے ۔(ن) لیگی مذاکراتی کمیٹی میں خواجہ آصف ، خواجہ سعد رفیق، احسن اقبال، سردار ایاز صادق اور اسحاق ڈار شامل ہیں ۔
مسلم لیگ (ن) کے سینئر رہنمائوں پر مشتمل کمیٹی کو اہم ٹاسک دیدیا گیا۔ ذرائع کے مطابق مذاکراتی کمیٹی پیپلزپارٹی ، جے یو آئی (ف) ، ایم کیو ایم پاکستان سمیت دیگر اتحادیوں سے مذاکرات کرے گی۔ذرائع کے مطابق شہبازشریف نے اتحادی جماعتوں کو بھی مذاکراتی کمیٹی تشکیل دینے کی ہدایت کر دی۔مسلم لیگ ن کی مذاکراتی کمیٹی پارٹی قائد نوازشریف سے براہ راست رابطے میں رہے گی، کمیٹی قومی اسمبلی کی تحلیل اور نگران وزیراعظم سمیت سیاسی معاملات پر بات چیت کرے گی۔
