اسلام آباد(این این آئی)نائب وزیراعظم اسحق ڈار نے خضدارمیں دہشت گرد حملے میں سکول کے بچوں کی شہادت پر گہرے رنج و غم کا اظہار کیا ہے۔ بدھ کو سماجی رابطہ کی ویب سائٹ ایکس پر ایک پوسٹ میں اسحق ڈارنے کہاکہ خضدار میں سکول بس پر بھارتی ایجنٹوں کے بزدلانہ دہشت گردی کے حملے پر دل شدید رنجیدہ ہے جس میں معصوم بچوں کو نشانہ بنایا گیا جن میں سے تین بچے شہید اور کئی زخمی ہوئے۔ انہوں نے کہا کہ ہماری دعائیں شہدا اور ان کے اہلخانہ کے ساتھ ہیں ، اس بہیمانہ دہشت گرد حملے کے منصوبہ سازوں اور مجرموں کو انصاف کے کٹہرے میں لایا جائے گا۔
