مشکل حالات ہوں تو اندازہ ہوتا ہے فوج کتنی ضروری ہے، انور مقصود

کراچی (این این آئی)مشہور مصنف انور مقصود نے کہا ہے کہ مشکل حالات ہوں تو اندازہ ہوتا ہے فوج کتنی ضروری ہے، آج 25 کروڑ پاکستانی سپاہی بن گئے ہیں۔پاک بھارت کشیدگی بارے بات کرتے ہوئے انور مقصود نے کہا کہ میرے پاس ہتھیار نہیں، میرا ہتھیار میرا قلم ہے تو جو کچھ بھی مجھ سے ہو سکتا ہے میں اس ملک کیلئے کروں گا۔انہوں نے کہا کہ میں اپنے پرچم کی عزت بالکل اسی طرح کرتا ہوں جیسے کوئی ہندوستانی اپنے پرچم کی عزت کرتا ہے۔انور مقصود نے کہا کہ مجھے بھارت کے 5جہاز گرنے کی اتنی خوشی نہیں ہے جتنا دکھ معصوم پاکستانیوں کے جانی نقصان کا ہے۔انہوں نے کہا کہ جنگ شروع کرنا بہت آسان ہے ایک چھوٹے سے واقعے سے ہی جنگ شروع کی جا سکتی ہے لیکن اسے ختم کرنا بہت مشکل ہے، تو دعا کریں کہ سلسلہ آگے نہ بڑھے۔انور مقصود نے کہا کہ مودی کو ووٹ ملے ہیں لیکن شاید اس حادثے کے بعد انہیں کچھ عقل آجائے کہ وہ مسلمانوں کے ساتھ برا سلوک کر رہے ہیں۔انہوں نے کہا کہ زمانہ بدل گیا ہے تو مودی کو سمجھنا چاہیے کہ اب کوئی بھی جنگ نہیں چاہتا۔ انور مقصود نے کہا کہ سب ملک کو ترقی کرتے دیکھنا چاہتے ہیں تو اس کیلئے ہم سب پاکستانیوں کو بھی اسی جانب چلنا پڑے گا جس طرف ہماری حکومت اور فوج چلنا چاہتی ہے۔