اسلام آباد(این این آئی)صدر مملکت آصف علی زرداری نے اٹلی کے وزیر داخلہ کے ساتھ پاکستان کے خلاف بھارتی بلا اشتعال فوجی جارحیت پر گفتگو کرتے ہوئے کہا ہے کہ انتہا پسند بھارتی حکومت نے پورے خطے کے امن و استحکام کو خطرے میں ڈال دیا ہے۔تفصیلات کے مطابق صدر مملکت آصف علی زرداری سے ایوان صدر میں اٹلی کے وزیر داخلہ میٹیو پینٹے ڈوسی نے وفد کے ہمراہ ملاقات کی، ملاقات میں باہمی دلچسپی کے مختلف شعبوں میں دوطرفہ تعاون بڑھانے پر تبادلہ خیال کیا گیا۔اس موقع پر آصف علی زرداری نے کہاکہ پاکستان اٹلی کے ساتھ مختلف شعبوں میں باہمی سود مند تعاون بہتر بنانے کیلئے پرعزم ہے۔صدر پاکستان نے اٹلی کے وزیر داخلہ کے ساتھ پاکستان کے خلاف بھارتی بلا اشتعال فوجی جارحیت پر گفتگو کرتے ہوئے کہاکہ انتہا پسند بھارتی حکومت نے پورے خطے کے امن و استحکام کو خطرے میں ڈال دیا ہے۔انہوںنے کہاکہ بھارت کے جارحانہ اقدامات سے خطے کیلئے خطرناک نتائج نکلیں گے۔اٹلی کے وزیر داخلہ نے پاکستان پر بھارتی حملے میں شہید ہونے والے شہریوں کے اہل خانہ سے تعزیت کا اظہار کیا۔انہوںنے کہاکہ موجودہ صورتحال کے خاتمے کیلئے پاکستان کے تحفظات اپنی حکومت اور عالمی برادری تک پہنچائیں گے۔انہوں نے کہا کہ پاکستان اور اٹلی انسانی اسمگلنگ اور دہشت گردی کے خلاف تعاون کر رہے ہیں، دونوں ممالک کے درمیان اقتصادی تعاون کی بڑی گنجائش ہے۔میٹیو پینٹے ڈوسی نے کہاکہ اٹلی میں ایک لاکھ 60ہزار پاکستانی تارکین وطن اطالوی معاشرے اور ترقی میں مثبت کردار ادا کر رہے ہیں۔صدر مملکت نے نازک حالات میں پاکستان کا دورہ کرنے پر اطالوی وزیر کا شکریہ ادا کیا۔بعد ازاں ، اٹلی میں قانونی نقل مکانی ، ہنرمند لیبر کی نقل و حرکت آسان بنانے کیلئے پاکستان اور اٹلی کے مابین مفاہمت کی 2یادداشتوں پر دستخط بھی کیے گئے۔
