اسلام آباد (این این آئی)چیئرمین پاکستان پیپلز پارٹی بلاول بھٹو زرداری نے کہا ہے کہ پاکستان و بھارت ایٹمی طاقت ہیں، خدا نہ کرے کہ دونوں ممالک کے درمیان کوئی ایٹمی تصادم ہو۔چیئرمین پیپلز پارٹی بلاول بھٹو زرداری نے برطانوی میڈیا سے گفتگو کرتے ہوئے کہا کہ پاکستان کسی بھی بھارتی جارحیت کا موثر جواب دینے کی بھرپور صلاحیت رکھتا ہے۔بلاول بھٹو زرداری نے کہا کہ فضائیہ اور بحریہ سمیت ہماری مسلح افواج بھرپور صلاحیتوں کی حامل ہے۔انہوں نے کہا ہے کہ بدقسمتی سے ماضی میں دونوں ممالک کے درمیان جنگیں ہو چکی ہیں، ہماری یہی امید ہے کہ اب ایسا نہ ہو، ہوش مندی غالب آئے۔بلاول بھٹو نے زور دیتے ہوئے کہا ہے کہ بین الاقوامی برادری دونوں ممالک سے رابطے میں رہے، بین الاقوامی برادری موثر طور پر مداخلت کرے تاکہ کشیدگی نہ بڑھے۔سابق وزیرِ خارجہ نے پہلگام واقعے کے حوالے سے کہا کہ اس واقعے کی ایک شفاف، منصفانہ اور غیر جانبدارانہ تحقیقات کی جائیں۔انہوں نے خواہش کا اظہار کیا کہ ایسا ماحول پیدا کیا جائے جہاں بھارت اور پاکستان مل کر کام کر سکیں۔انہوں نے خدشات کا اظہار کرتے ہوئے کہا کہ پاک بھارت کشیدگی میں اضافے پر یہ خدشہ ہمیشہ موجود رہتا ہے، ایسا نہ ہوا تو معاملہ کسی محدود جھڑپ کی صورت اختیار کر سکتا ہے، جھڑپ فضائیہ یا کسی اور فوجی شعبے میں ہوسکتی ہے،یہ جھڑپ مکمل جنگ کی شکل بھی لے سکتی ہے۔
