ممبئی (این این آئی)بالی ووڈ اداکار سلمان کو جان سے مارنے کی دھمکی کے کچھ ہی گھنٹے بعد ان کا مبہم بیان سامنے آ گیا۔بھارتی میڈیا کے مطابق گزشتہ روز ممبئی ٹریفک پولیس کی ہیلپ لائن کے واٹس ایپ نمبر پر ایک بار پھر سلمان خان کے لیے دھمکی موصول ہوئی تھی جس میں کہا گیا تھا کہ سلمان خان کو ان کے گھر میں داخل ہونے کے بعد مار ڈالیں گے اور ان کی گاڑی کو بم سے اڑا دیں گے۔بعد ازاں ممبئی پولیس نے اس حوالے سے شکایت درج کر کے تحقیقات کا آغاز کر دیا تھا۔اب اس موصول ہونے والی دھمکی کے بعد سلمان خان نے اپنی نئی تصویر اور پیغام سوشل میڈیا پر شیئر کیا ہے۔سلمان خان نے جِم کے ٹریننگ سیشن سے تصویر شیئر کر کے لکھا ہے کہ حوصلہ افزائی کے لیے آپ کا شکریہ۔سوشل میڈیا پر سلمان خان کی یہ نئی تصویر اور اس میں دکھائی دینے والی ان کی محنت اور فٹنس کو دیکھ کر مداح حیران رہ گئے جس کے بعد اس پر تعریف کرنے والوں کی لائن لگ گئی۔علاوہ ازیں کچھ مداحوں نے سلمان خان کی تصویر اور ان کے پیغام کو دھمکی دینے والوں سے بھی جوڑ دیا۔رپورٹس کے مطابق سلمان خان کی اس نئی پوسٹ اور اس میں لکھے گئے الفاظ نے مداحوں کو تجسس میں ڈال دیا ہے کہ اداکار نے یہ الفاظ کس کے لیے لکھے ہیں۔دوسری جانب مداح اس کو دھمکی دینے والوں کے لیے پیغام بھی قرار دے رہے ہیں تاہم ابھی تک اس حوالے سے کوئی باضابطہ چیز سامنے نہیں آئی ہے۔
