اسلام آباد(این این آئی)نیشنل ڈیٹابیس اینڈ رجسٹریشن اتھارٹی (نادرا)میں اسمارٹ کارڈ،آئرس اور مردم شماری ٹیبلٹس کی خریداری میں 14ارب روپے کی کرپشن کا انکشاف ہوا ہے۔پارلیمنٹ کی پبلک اکائونٹس کمیٹی کے اجلاس چیئرمین نورعالم خان کی زیرصدارت ہوا جس میں نادرا میں کرپشن کا خط پیش کیا۔

نادرا ملازمین کا خط چیئرمین پی اے سی، سیکرٹری داخلہ، چیئرمین نیب اور ڈی جی ایف آئی اے کو موصول ہوا ۔خط میں کہا گیا کہ نادرا اسمارٹ کارڈ، مردم شماری ٹیبلیٹس کی خریداری میں14ارب کی کرپشن ہوئی ہے۔نور عالم خان نے کہاکہ صرف چیئرمین نادرا نے استعفیٰ دیا، دیگرافسران عہدوں پرکام کر رہے ہیں، سیکرٹری داخلہ نے ہاتھ کھڑے کردیئے ہیں وہ بے بس نظرآئے، ملازمین نے خط کے ذریعے کرپشن کی تفصیلات سے آگاہ کیا۔

اس حوالے سے ایف آئی اے حکام نے کہاکہ کرپشن پرسابق چیئرمین نادرا کا بیان رکارڈ کرلیا گیا ہے اورانکوائری کیلئے جے آئی ٹی بنائی جارہی ہے۔خیال رہے کہ گزشتہ دنوں نادرا کے سابق چیئرمین طارق ملک نے اپنے عہدے سے مستعفی ہوگئے تھے اور وزیراعظم شہباز شریف نے ان کا استعفیٰ منظور کرلیا تھا۔