اسلام آباد (این این آئی)سیکرٹری جنرل پیپلز پارٹی پارلیمنٹرینز نیئر حسین بخاری نے کہا ہے کہ پارلیمان کے مشترکہ اجلاس سے خطاب میں صدر آصف زرداری نے قومی معاملات و مسائل کے حل کیلئے روڈ میپ دیا۔جاری بیان میں نیئر بخاری نے کہا کہ صدر مملکت کی تقریر معاشی و سیاسی استحکام اورقومی سلامتی کیلئے جامع لائحہ عمل پر مبنی تھی۔صدر نے قومی اتحاد و یکجہتی کی خاطر اتفاق رائے ،مشاورتی طرز حکمرانی اپنانے ،جمہوری اقدار، جامع ترقی اور متوازن خارجہ پالیسی پر زور دیا۔ انہوں نے کہا کہ صدر نے ممبران پارلیمنٹ کو تلقین کی کہ سیاسی اختلافات سے بالاتر ہو کر قومی مفادات کو ترجیح بنائیں۔انہوں نے کہا کہ سرکاری ملازمین کی تنخواہیں ،پنشن اضافہ کرنے کا اعزاز رکھنے والے صدر نے تنخواہ دار طبقے پر ٹیکس کم کرنے اورتنخواہوں میں اضافہ کرنے کا مطالبہ کیا۔انہوں نے کہا کہ صدر مملکت نے دہشت گردی کے خاتمے کے پختہ عزم کا اعادہ کیا،صدر مملکت نے سیاسی جماعتوں کے درمیان تعاون کے فروغ کو لازمی قرار دیا ہے، مشترکہ اجلاس میں پی ٹی آئی کا غیر پارلیمانی رویہ افسوسناک ہے۔
