اسلام آباد (این این آئی)رواں مالی سال کے 8ماہ میں ایف بی آر کا ٹیکس شارٹ فال 604ارب روپے تک پہنچ گیا ہے،عالمی مالیاتی فنڈ سے 31مارچ تک 91کھرب 68ارب روپے ٹیکس وصولی پر اتفاق کیا گیا ہے جسے پورا کرنے کیلئے رواں ماہ 18کھرب 25ارب روپے کی وصولی درکار ہے۔ جولائی سے فروری 2025ء تک ایف بی آر کی مجموعی ٹیکس وصولی 73کھرب 43ارب روپے رہی، جبکہ اس کا ہدف 79کھرب 47ارب روپے تھا۔ فروری کے مہینے میں صرف 847ارب روپے ٹیکس جمع کیا گیا جو مقررہ ہدف سے 136ارب روپے کم رہا۔ٹیکس وصولیوں میں کمی کے باعث حکومت کے لیے مالیاتی اہداف کا حصول مزید مشکل ہو گیا ہے، جبکہ مالیاتی خسارہ پورا کرنے کیلئے اضافی اقدامات پر غور کیا جا رہا ہے۔
