لاہور ( این این آئی) لاہورمیں چیمپئنز ٹرافی 2025ء کی افتتاحی تقریب کا انعقاد کیا گیا جس میں بورڈ عہدیداران سمیت قومی و انٹرنیشنل کرکٹرز نے شرکت کی۔لاہور کے شاہی قلعہ گرائونڈ میں چیمپئنز ٹرافی کی افتتاحی تقریب میں آئی سی سی کے چیف ایگزیکٹو جیف ایلر ڈائس، چیئرمین پی سی بی محسن نقوی، صوبائی وزیر کھیل فیصل ایوب کھوکھر، اسپیکر پنجاب اسمبلی ملک احمد خان بھی شریک ہوئے۔پی سی بی چیئرمین کے ایڈوائزر عامر میر اور وہاب ریاض کے علاوہ 2017میں چیمپئنز ٹرافی جیتنے والی قومی ٹیم کے کھلاڑی سرفراز احمد ، جنید خان ، حسن علی ، اظہر علی،محمد عامر ، شاداب خان اور عماد وسیم اور حارث سہیل تقریب میں شریک ہوئے، اس کے علاوہ سابق جنوبی افریقن بلے باز جے پی ڈومنی اور کیوی فاسٹ بالر ٹم سائوتھی نے بھی افتتاحی تقریب میں شرکت کی۔افتتاحی تقریب سے خطاب کرتے ہوئے چیئرمین پی سی بی محسن نقوی نے کہا کہ قذافی اسٹیڈیم کو آئی سی سی چیمپئنز ٹرافی کے لیے مکمل کیا، پاکستان میں آئی سی سی چیمپئنز ٹرافی کا ہونا تاریخی موقع ہے، ایک نسل اس طرح کے عالمی ایونٹس سے محروم رہی رہے۔پاکستان 29سال بعد چیمپئنز ٹرافی کی میزبانی کررہاہے۔انہوں نے کہا کہ دنیا دیکھ رہی ہے کہ پاکستان چیمپئنز ٹرافی کیلئے تیار ہے، چیمپئنز ٹرافی کی میزبانی انتھک محنت کے بعد حاصل ہوئی۔ چیمپئنز ٹرافی کے لئے مکمل تیار ہیں چار ٹیمیں یہاں پہنچ چکی ہیں، افغانستان، نیوزی لینڈ، جنوبی افریقہ اور پاکستان یہاں موجود ہیں، باقی ٹیمیں اگلے 48گھنٹوں میں یہاں موجود ہوں گی ۔ انہوں نے کہا کہ ہم نے چیمپئنز ٹرافی کیلئے ریکارڈ مدت میں اسٹیڈیم تیار کیے، ہم نے ایونٹ کے لیے بڑی محنت کی اسٹیڈیمز ریکارڈ وقت میں اپ ڈیٹ کئے، اسٹیڈیمز کی اپ گریڈیشن میں شامل ورکرز نے بڑی محنت کی۔ محسن نقوی نے کہا کہ لاہور، دیوان عام میں چیمپئنز ٹرافی کی افتتاحی تقریب یادگار ہے، یہ ایک ایونٹ نہیں بلکہ کرکٹرز کیلئے خود کو منوانے کا ایک سنہری موقع ہے۔ چیئرمین پی سی بی نے کہا کہ آئی سی سی ٹیم نے بھی بہت محنت کی ، انہیں سراہتا ہوں ۔ انہوں نے کہا کہ چیمپئنز ٹرافی 2017ء کی ونر ٹیم پاکستان کو خاص طور پر خوش آمدید کہتا ہوں۔ انٹرنیشنل کرکٹ کونسل (آئی سی سی)کے چیف ایگزیکٹیو آفیسر جیف ایلڈائس نے 117روز میں قذافی اور نیشنل اسٹیڈیم کی جدید انداز سے تعمیر اور تکمیل کو بڑا کارنامہ قرار دے دیا۔آئی سی سی کے چیف ایگزیکٹو جیف ایلڈائس نے چیمپئنز ٹرافی کی افتتاحی تقریب سے خطاب کرتے ہوئے کہا ہے کہا لپ اگلے دو ہفتوں تک شائقین کو بہترین کرکٹ دیکھنے کو ملے گی۔انہوں نے کہا کہ آئی سی سی چیمپئنز ٹرافی میں پاکستان کے پاس کرکٹ سے اپنے جنون کو دکھانے کا سنہری موقع ہے، میں نے اوول میں پاکستان ٹیم کو چیمپیئنز ٹرافی جیتتے دیکھا ہے۔جیف ایلڈائس نے کہا کہ قذافی اسٹیڈیم اور نیشنل اسٹیڈیم کراچی کو جدید صورت میں دیکھ کر خوشی ہوئی، قذافی اسٹیڈیم کی 117 روز میں تکمیل ایک بڑا کارنامہ ہے۔انہوں نے مزید کہا کہ اگلے دو ہفتے شائقین کو پاکستان میں بہترین کرکٹ دیکھنے کو ملے گی۔آئی سی سی چیمپئنز ٹرافی کے ایمبیسیڈر اور سابق کپتان قومی ٹیم سرفراز احمد نے کہا کہ آپ سب کو یہاں خش آمدید کہتا ہوں، ہم نے 2017ء میں ایونٹ جیتا اب یہ ایونٹ پاکستان میں ہو رہا ہے، ہم اس ایونٹ کے لئے کافی پرجوش ہیں۔انہوں نے کہا کہ 2017کی چیمپئنز ٹرافی کے فاتح لمحات الفاظ میں بیان نہیں کر سکتا، ہم نے فائنل میں بھارت کو ہرایا جو بھلایا نہیں جا سکتا، جب واپس پہنچے ہر سطح پر لوگوں نے بہت بڑا استقبال کیا، پاکستان کرکٹ ٹیم بہت مقبول ہے ،یہ ٹیم ایک لمحے میں گرتی ہے تو دوسرے لمحے میں کھڑی ہو جاتی ہے۔آئی سی سی چیمپئنز ٹرافی کے ایمبیسیڈر ٹم سائوتھی نے خطاب کرتے ہوئے کہا کہ نیوزی لینڈ کی ٹیم پاکستان میں تاحال اچھے ردھم میں ہے، بہت اچھا لگا ہے پاکستان میں کھیل کر، تمام ٹیمیں ٹرائی سیریز میں اچھا کھیلیں۔انہوں نے کہا کہ چیمپئنز ٹرافی میں کسی میچ کو آسان نہیں لیا جاسکتا، اب ہر میچ کو اہم سمجھ کر کھیلنا ہوگا۔
