اسلام آباد(این این آئی)وزیر دفاع خواجہ آصف نے پی ٹی آئی کے لانگ مارچ کی کال پر درعمل دیتے ہوئے کہاہے کہ یہ سب پاکستان کو کرکٹ کے میدان میں تنہا اور شرمندہ کرنے کیلئے کیا جا رہا ہے۔سماجی رابطے کے پلیٹ فارم ایکس پر جاری اپنے بیان میں وزیر دفاع خواجہ آصف نے کہا کہ پی ٹی آئی نے 8 فروری کو لاہور میں احتجاج کی اجازت مانگی ہے جبکہ 8فروری کو ہی لاہور میں پاکستان اور نیوزی لینڈ کا پہلامیچ ہے۔وزیر دفاع نے کہا کہ 19فروری کو پی ٹی آئی نے لانگ مارچ کی کال دی ہے جبکہ 19فروری کو ہی پاکستان میں چیمپیئنز ٹرافی کا پہلامیچ ہے۔خواجہ آصف نے کہا کہ یہ پاکستان سے چیمپیئنز ٹرافی کے میچ چھیننے کی وطن دشمن کوشش ہے اور یہ سب پاکستان کو کرکٹ کے میدان میں تنہا اور شرمندہ کرنے کیلئے کیا جا رہا ہے۔وزیردفاع نے کہاکہ اپنے سیاسی مفادات حاصل کرنے کیلئے عمران خان اس قدر گر سکتا ہے شاید ان کے سپورٹر بھی نہیں سوچ سکتے ہیں۔
