ڈیووس (این این آئی) وفاقی وزیر خزانہ سینیٹر محمد اورنگزیب نے کہا ہے کہ چین نے سرمایہ کاری، ٹیکنالوجی، علوم کی منتقلی میں پاکستان کا ساتھ نبھایا ،دوسرے فیز میں چینی صنعتوں کی پاکستان منتقلی کے امکانات پر توجہ ہو گی، دوسروں کے تجربات سے سیکھ کر پاکستان کے آئی ٹی شعبے کو آگے لے جانے کے خواہاں ہیں۔ڈیووس میں چینی میڈیا سے گفتگو میں وفاقی وزیر خزانہ نے کہا کہ چین نے سرمایہ کاری، ٹیکنالوجی، علوم کی منتقلی میں پاکستان کا ساتھ نبھایا ہے، پاکستان کو چینی صنعتوں کیلئے برآمدی مرکز بنانے کی کوشش ہو گی۔انہوں نے کہا کہ سی پیک سیکنڈ فیز میں باہمی کاروباری شراکتوں کے ثمرات نمایاں ہونگے، اس فیز میں چینی صنعتوں کی پاکستان منتقلی کے امکانات پر توجہ ہو گی۔انہوں نے کہا کہ ہماری کوشش ہے اسی سال پانڈا بانڈ کا اجراء ہو جائے، ہم چینی کیپٹل مارکیٹ تک رسائی کیلئے کوشاں ہیں۔انہوں نے کہا کہ پہلے ایف ڈی آئی ڈیجیٹل انیشی ایٹو کا پاکستان کیلئے اجرا ہمارے لئے اعزاز کی بات ہے، ہم دوسروں کے تجربات سے سیکھ کر پاکستان کے آئی ٹی شعبے کو آگے لے جانے کے خواہاں ہیں۔