اسلام آباد (این این آئی)وزیراعظم کی قومی اسمبلی آمد کے موقع پر پاکستان تحریک انصاف (پی ٹی آئی) ارکان کی جانب سے احتجاج کیا گیا اور اوووو اوووو کی آوازیں لگائیں ،اراکین نے ایجنڈے کی کاپیاں پھاڑ دیں اور بانی پی ٹی آئی کی رہائی کے حق میں نعرے بازی کرتے رہے جبکہ مسلم لیگ (ن) کے اراکین نے بھی جوابی نعرے بازی کی تاہم شہباز شریف ایوان سے خطاب کیے بغیر واپس روانہ ہوئے۔منگل کو قومی اسمبلی کا اجلاس اسپیکر ایاز صادق کی صدارت میں شروع ہوا، ایوان کی کارروائی کے دوران مرد اور خواتین ووٹروں میں پائے جانے والے فرق سے متعلق توجہ دلاؤ نوٹس پر وزیر قانون اعظم نذیر تارڑ نے کہا کہ 2018 میں فرق 11.8 تھا۔انہوںنے کہاکہ حالیہ انتخابات میں یہ فرق کم ہوکر 7.4 پر آگیا ہے ،86 اضلاع میں یہ فرق 10 فیصد سے بھی کم ہوگیا ہے، الیکشن کمیشن اپنی ذمہ داری کو کم کرنے کیلئے کوشاں ہے۔مسلم لیگ (ن) کی رکن قومی اسمبلی آسیہ ناز تنولی نے کہا کہ الیکشن کمیشن کے مطابق آج بھی یہ ووٹرز کا صنفی فرق ایک کروڑ سے زیادہ ہے، جو پالیسیاں بنائی گئی ہیں وہ کار آمد ثابت نہیں ہوئیں، اس مسئلے کے حل کیلئے ٹائم فریم دینا چاہیے۔انجینئر حمید حسین نے کرم کے معاملے پر احتجاج کیا، اس دوران وہ بینر اٹھائے وزیراعظم کی نشست کے سامنے آگئے۔قانون شہادت ترمیمی بل 2025 قومی اسمبلی میں پیش کیا گیا، ترمیمی بل شازیہ مری نے پیش کیا۔قومی اسمبلی اجلاس کے دوران وزیراعظم شہباز شریف بھی ایوان میں پہنچے، حکومتی اراکین نے ڈیسک بجا کر وزیراعظم کا استقبال کیا تاہم اپوزیشن اراکین نے وزیراعظم کی آمد پر نعرے بازی کی۔تحریک انصاف کے اراکین نے عصر کی آذان کے دوران کچھ دیر کے لیے احتجاج موخر کیا، آذان کے بعد تانصاف کے اراکین کا احتجاج ایک مرتبہ پھر شروع کردیا، اراکین نے ایجنڈے کی کاپیاں پھاڑ دیں اور بانی پی ٹی آئی کی رہائی کے حق میں نعرے بازی کرتے رہے۔تحریک انصاف کے چیئرمین بیرسٹر گوہر، اپوزیشن لیڈر عمر ایوب بھی احتجاج کرنے والوں میں شامل تھے، وزیراعظم کی نشست کے سامنے عطا تارڑ، ملک ابرار اور حنیف عباسی موجود رہے، وزیراعظم تقریر کیے بغیر ایوان سے واپس روانہ ہوئے۔بعد ازاں، اسپیکر قومی اسمبلی نے اجلاس (آج) بدھ کو دن دو بجے تک ملتوی کر دیا۔اس کے علاوہ، چاروں صوبوں اور اسلام آباد سے اقلیت نشست دینے کا بل موخر ہوگیا، وزیرقانون نے کہا کہ یہ بل پہلے سے زیر غور ہے۔نیکسس بین الاقوامی یونیورسٹی ہیلتھ اینڈ ٹیکنالوجیز کے قیام کا بل پیش کیا گیا، بل انجم عقیل خان نے پیش کیا، نیکسس بین الاقوامی یونیورسٹی ہیلتھ اینڈ ٹیکنالوجیز کے قیام کا منظور کرلیا گیا۔پیپلزپارٹی کے رکن قومی اسمبلی آغا رفیع اللہ نے 25 فیصد غریب بچوں کو اسکالرشپ دینے کی ترمیم پیش کی جس پر وزیر قانون نے کہا کہ اس کو 25 کے بجائے 10 فیصد کردیا جائے، نوید قمر نے کہا کہ آج بل کو پاس کرنے دیں بعد میں ترمیم کرسکتے ہیں۔بین الاقوامی امتحانی بورڈ بل 2024 موخر کردیا گیا، رانا قاسم نون کا کہنا تھا کہ اس سے سالانہ اربوں روپوں کی بچت ہوگی، بین الاقوامی ادارے بہت سارا سرمایہ بیرون ملک لے جاتے ہیں۔وزیر قانون نے کہا کہ اس بل کو اگلے ایجنڈے پر لایا جائے جب کہ وزیر تعلیم خالد مقبول صدیقی کا کہنا تھا کہ یہ اہم بل ہے اس پر مزید غور کرنا چاہیے۔
