اسلام آباد (این این آئی) پی ٹی آئی نے فنڈز اکٹھا کرنے کیلئے سنٹرل فنانس بورڈ قائم کرتے ہوئے نوٹیفکیشن جاری کردیا ۔نوٹیفکیشن کے مطابق پی ٹی آئی کے سیکرٹری جنرل، ایڈیشنل سیکرٹری جنرل سمیت فنانس بورڈ کے 13ممبران ہوں گے۔سنٹرل فنانس بورڈ کے ٹی آو آرز بھی تفصیلاً جاری کئے گئے ہیں جن کے مطابق بورڈ پارٹی کے اکائونٹس مینیج کرے گا جبکہ قانون کے تحت اکائونٹس کا آڈٹ کرنے کی ذمہ داری بھی بورڈ پر عائد ہو گی۔نوٹیفکیشن کے مطابق فنانس بورڈ پارٹی کیلئے فنڈنگ اکٹھا کرے گا اور اس کا حساب بھی رکھے گا، بورڈ ہر مہینے کی 10تاریخ کو گزشتہ ماہ کا ریکارڈ پیش کرے گا، سیاسی کمیٹی کی منظوری کے بعد 15جون کو بورڈ پارٹی کا بجٹ بھی بنائے گا۔نوٹیفکیشن کے مطابق بورڈ سیکرٹری جنرل یا چیئرمین کی اجازت کے بغیر بجٹ میں تبدیلی نہیں کرسکے گا۔دوسری جانب پی ٹی آئی نے سابق صدر عارف علوی کی سربراہی میں ممبرشپ کمیٹی تشکیل دے دی۔کمیٹی ممبران میں فردوس شمیم نقوی، مونس الٰہی، خالد خورشید، ڈاکٹر سلیمان خان، نعمان افضل، جبران الیاس، سلمان امجد شامل ہیں،نوٹیفکیشن کے مطابق کمیٹی میں ہر صوبے سے ایک ایک نمائندہ شامل ہوگا۔
