بیجنگ(این این آئی)وینزویلا کی حکومت کی دعوت پر چینی صدر شی جن پھنگ کے خصوصی ایلچی اور چین کے قومی عوامی کانگریس کی قائمہ کمیٹی کے نائب چیئرمین وانگ ڈونگ مینگ نے کراکس میں صدر نکولس مادورو کی صدارتی حلف برداری کی تقریب میں شرکت کی۔اتوا ر کو چینی میڈ یا کے مطا بق تقریب کے بعد صدر مادورو نے وانگ ڈونگ مینگ سے ملاقات کی۔ وانگ ڈونگ مینگ نے کہا کہ گزشتہ سال دونوں ممالک نے چین وینزویلا سفارتی تعلقات کے قیام کی 50ویں سالگرہ پروقار طریقے سے منائی ۔ چین وینزویلا کے ساتھ مل کر دونوں سربراہان مملکت کے درمیان طے پانے والے اہم اتفاق رائے پر عمل درآمد جاری رکھنے اور روایتی دوستی کو مستحکم اور فروغ دینے کیلئے تیار ہے تاکہ دونوں ممالک کے تعلقات مسلسل ترقی کر سکیں اور دونوں ممالک کے عوام کو فائدہ پہنچ سکے۔ صدر مادورو نے اپنی صدارتی حلف برداری کی تقریب میں شرکت کیلئے خصوصی ایلچی بھیجنے پر چینی صدر شی جن پھنگ کا شکریہ ادا کیا اور کہا کہ وینزویلا چین کیساتھ اپنی ہمہ موسمی اسٹریٹجک شراکت داری کی ترقی کو بہت اہمیت دیتا ہے۔ وینزویلا اپنے مرکزی مفادات کے تحفظ میں چین کی بھرپور حمایت کرتا ہے، اور چین کے ساتھ ملکر دوطرفہ تعلقات کو ایک نئی بلندی تک لے جانے کیلئے تیار ہے۔
