راولپنڈی(این این آئی)رہنما مسلم لیگ(ن)حنیف عباسی نے کہاہے کہ پی ٹی آئی والے راتوں کو معافی مانگتے ، صبح پریس کانفرنس کرتے ہیں۔راولپنڈی میں کارکنوں سے خطاب کرتے ہوئے حنیف عباسی نے کہا کہ بانی پی ٹی آئی نے ہمیشہ ذاتی مفاد کو قومی مفاد پرترجیح دی، پی ٹی آئی دورمیں کوئی ترقیاتی منصوبہ نہیں دیا گیا، وزیراعلیٰ پنجاب ترقیاتی منصوبوں کوترجیح دے رہی ہیں۔انہوں نے کہاکہ ملک میں دشمن کی کوئی سازش کامیاب نہیں ہونے دیں گے، نوجوان نسل ملکی تعمیروترقی اورخوشحالی کیلئے آگے بڑھیں، عوامی خدمت کا سفرجاری رکھیں گے، عوام کوسہولیات کی فراہمی ہماری ترجیح ہے۔رہنما مسلم لیگ ن نے کہاکہ حکومتی اقدامات سے ملکی معیشت درست سمت میں گامزن ہے، سکیورٹی فورسز قیام امن کیلئے قربانیاں دے رہی ہیں، ایٹمی اورمیزائل پروگرام عوام کا ہے وہی اس کی حفاظت کریں گے۔حنیف عباسی نے کہا کہ ملکی سالمیت پرکوئی سمجھوتہ نہیں کیا جائے گا، یہ سب کمپرومائزڈ ہیں، پی ٹی آئی والے راتوں کو گڑگڑاتے اور معافی مانگتے ہیں اور صبح پریس کانفرنس کرتے ہیں۔