لاہور(این این آئی) پاکستان کرکٹ بورڈ نے ویسٹ انڈیز کیخلاف آئی سی سی ورلڈ ٹیسٹ چمپئن شپ کے 2ٹیسٹ میچوں کیلئے 15 رکنی اسکواڈ کا اعلان کردیا جو 17 سے 21 جنوری اور 25 سے 29 جنوری تک ملتان میں کھیلے جائیں گے۔اسکواڈ میں جنوبی افریقہ کا دورہ کرنے والی 15 رکنی ٹیسٹ ٹیم میں سات تبدیلیاں کی گئی ہیں۔ برقرار رکھے گئے کھلاڑیوں میں شان مسعود (کپتان)، سعود شکیل (نائب کپتان)، بابر اعظم، کامران غلام، خرم شہزاد، محمد رضوان، نعمان علی، اور سلمان علی آغا شامل ہیں، سپن کے شعبے کو مضبوط بنانے کیلئے آف اسپنر ساجد خان اور لیفٹ آرم اسپنر نعمان علی کیساتھ پارٹنر بنانے کیلئے لیگ اسپنر ابرار احمد کو واپس بلایا گیا ہے، زخمی صائم ایوب اور آؤٹ آف فارم عبداللہ شفیق کی جگہ اوپنرز امام الحق اور محمد ہریرہ کو بھی واپس لایا گیا ہے۔ورک لوڈ مینجمنٹ کے حصے کے طور پر عامر جمال، محمد عباس، میر حمزہ اور نسیم شاہ کو آرام دیا گیا ہے۔ ان کی جگہ سلیکٹرز نے خرم شہزاد کو برقرار رکھا ہے جبکہ محمد علی کو واپس بلایا ہے اور ان کیپڈ کاشف علی کو شامل کیا ہے۔وکٹ کیپر بیٹر حسیب اللہ کی غیر موجودگی میں جو جنوبی افریقہ کے دورے میں زخمی ہوگئے تھے ، پاکستان انڈر 19 کے سابق کپتان اور شاہینز کے کپتان روحیل نذیر کو اسکواڈ میں شامل کیا گیا ہے۔جبکہ ویسٹ انڈیز کے خلاف ٹیسٹ کیلئے پاکستانی اسکواڈ میں شان مسعود (کپتان) سعود شکیل (نائب کپتان) ابرار احمد، بابر اعظم، امام الحق، کامران غلام، کاشف علی، خرم شہزاد، محمد علی، محمد ہریرہ، محمد رضوان (وکٹ کیپر/ بیٹر )، نعمان علی، روحیل نذیر (وکٹ کیپر/ بیٹر )، ساجد خان اور سلمان علی آغا شامل ہیں۔
