ہم ہالی ووڈ والوں سے بڑے لوگ ہیں، خلیل الرحمن قمر

لاہور (این این آئی)معروف پاکستانی ڈرامہ نگار خلیل الرحمن قمر نے پاکستانی فلموں کو ہالی ووڈ فلموں سے بہتر قرار دے دیا۔خلیل الرحمن قمر نے پوڈ کاسٹ میں گفتگو کرتے ہوئے خلیل الرحمن قمر نے کہاکہ میں ہالی ووڈ کے بارے میں سوچتا ہی نہیں ،آپ لوگ بچوں والی باتیں کیوں کرتے ہیں؟۔انہوں نے کہا کہ ہم ہالی ووڈ والوں سے بڑے لوگ ہیں، ان کے پاس صرف وسائل ہم سے بڑے ہیں، تخلیقی صلاحیت کسی امریکا، انڈیا یا جاپان کی محتاج نہیں ہے، ہم لوگ یہاں نہ ہونے کے برابر وسائل میں اچھی فلمیں بناتے ہیں۔خلیل الرحمن قمر نے کہا کہ ہم قلیل وسائل کے ساتھ اچھی فلمیں بناتے ہیں تو اس کا مطلب صاف ہے کہ ہمارے پاس تخلیقی صلاحیت ہالی ووڈ والوں سے زیادہ ہے۔انہوں نے کہا کہ اگر مجھے ہالی ووڈ کو ملنے والے وسائل کا ایک تہائی حصہ بھی دے دیا جائے تو میں ہالی ووڈ فلموں سے 10 گنا بہتر فلمیں آرام سے بنا کر دے دوں گا۔