اسلام آباد(این این آئی)وزیراعظم شہباز شریف نے کرسمس کے پر مسرت موقع پر پاکستان اور دنیا بھر میں اپنے مسیحی بہنوں اور بھائیوں کو دلی مبارکباد پیش کی ہے۔کرسمس کے موقع پر اپنے پیغام میںوزیراعظم نے کہاکہ تمام انسانیت کیلئے امن، بھائی چارے اور محبت کا پیغام جیسا کہ حضرت عیسی علیہ السلام نے ہمیں سکھایاکہ ہمدردی، مہربانی، رحم، اور حکمت جیسی پائیدار اقدار کی تبلیغ کرنا، لوگوں کی نیک زندگی کی جانب رہنمائی کرنااور انہیں رب العزت کی قربت حاصل کرنے کی ترغیب دینا ہے۔وزیراعظم نے کہاکہ آج کے دن ہم اپنے مسیحی بہنوں اور بھائیوں کی طرف سے ملک کی ترقی اور استحکام، خاص طور پر تعلیم، صحت کی دیکھ بھال اور قوم کی تعمیر کے شعبوں میں کیے گئے مثالی تعاون کو بھی خراج تحسین پیش کرتے ہیں۔ انہوںنے کہاکہ حکومت تمام مذہبی برادریوں کے حقوق کے تحفظ اور احترام کے ماحول کو فروغ دینے کے لیے پرعزم ہے ہم اس بات کو یقینی بناتے رہیں گے کہ تمام مذاہب کے لوگ آزادانہ طور پر اپنے عقائد پر عمل کر سکیں اور پاکستانی قوم کی اجتماعی ترقی میں اپنا حصہ ڈال سکیں اس پر مسرت موقع پر میری یہ دعا ہے کہ یہ کرسمس ہر گھر میں خوشیاں اور برکتیں لائے، اور آنے والا سال ہمارے پیارے ملک اور اس کے لوگوں کے لیے امید، امن اور کامیابیوں سے بھرا ہو۔
