بیجنگ(این این آئی )چینی صدر شی جن پنگ نے کہا ہے کہ چین کو امید ہے کہ امریکا دوطرفہ تعلقات کو مستحکم، صحت مند اور پائیدار سمت کی طرف بڑھانے کے لیے چین کے ساتھ مل کر کام کرے گا۔چینی میڈیا کے مطابق انہوں نے بیجنگ میں بڑی بین الاقوامی اقتصادی تنظیموں کے سربراہان کے ساتھ ملاقات کے دوران کہا کہ تجارتی جنگیں اور سائنس۔ ٹیکنالوجی کی جنگیں تاریخ کے رجحان اور معاشیات کے قوانین کے خلاف ہیں اوران جنگوں کا کوئی فاتح نہیں ہو گا۔انہوں نے مزید کہا کہ چین امریکی حکومت کے ساتھ بات چیت کو برقرار رکھنے، تعاون کو بڑھانے اور اختلافات کو حل کرنے کے لئے تیار ہے۔ انہوں نے کہا کہ چین کو رواں سال کی اقتصادی ترقی کے ہدف کو حاصل کرنے کے لیے مکمل اعتماد ہے اور وہ عالمی اقتصادی ترقی کے سب سے بڑے انجن کے طور پر اپنا کردار ادا کرتا رہے گا۔
